Alerta! Veíkulu Estadu La Halo Movimentu iha Loron Feriadu no Polísia Sei Detein Motorista Ne’ebé ho Kondisaun Lanu

Hatutan.com, (29 Dezembru 2025), Díli-Ekipa konjunta husi Polísia Nasional Timor-Leste (PNTL) liuhusi Unidade Tránzitu Rodoviáriu, Komisaun Anti-Korrupsaun (CAC, sigla portugés), Diresaun Jerál Jestaun Patrimóniu Estadu, sei halo operasaun no auto estop ba veíkulu Estadu ne’ebé halo movimentu iha ámbitu feriadu tinan foun, husi loron 01-05 Janeiru 2026.

Polísia Unidade Tránzitu asegura movimentu transporte sira iha missa kalan Natal, 24 Dezembru 2025. Foto/Média PNTL

“Operasaun ba veíkulu Estadu nian la’o nafatin. Iha loron feriadu ne’e labele utiliza veíkulu Estadu hodi tula família,”  Komadante Polísia Nasionál Timor-Leste (PNTL) Munisípiu Díli, Superintendente Xefe Polísia Orlando Gomes informa ba jornalista sira iha Díli, Segunda (29/12/2025).

Tuir regulamentu no lei utilizasaun veíkulu Estadu nian bainhira halo movimentu iha loron feriadu tenke iha autorizasaun husi superiór ka tenke aprezenta  karta ofisiál husi instituisaun relevante. Maibé kuandu laiha maka ekipa konjunta sei halo apreensaun.

Biban ne’e, Superintendente Xefe Polísia Orlando Gomes, informa mós katak durante selebrasaun missa tinan foun iha kalan 31 fulan-Dezembru ne’e, Polísia la tolera joven sira hemu tua iha Estrada ninin no perturba ordem públiku.

PNTL servisu hamutuk ho grupu joven balun, no Konsellu Polisiamentu Komunitariu (KPK), hamutuk ho FALINTIL-Forsa Defeza Timor-Leste (F-FDTL) hodi halo patrullamentu la’o ain iha bairru sira ne’ebé identidikadu ona risku konflitu.

“Ita hatene katak iha loron 01 fulan-Janeiru 2026, sidadaun sira maioria ba paseiu iha tasi-ibun sira, nune’e PNTL kontinua asegura atu selebrasaun família sira nian iha tasi ibun sira la’o ho hakmatek,” nia hateten.

Superintendente Xefe Polísia Orlando Gomes, afirma motorista sira ne’ebé kondus karreta ho motós atu la bele hemu tua no bainhira iha auto estop makai da indikasaun iis tua sei hapara no halo apreensaun no detensaun ba motorista ne’ebé iis tua no lanu.

“Polísia Tránzitu sei halo auto  estop para atu nune’e evita  mosu asidente fatal ne’ebé rezulta ema lakon vida tanba kauza husi motorista lanu,”  Orlando Gomes  afirma.

Jornalista: Juvinal Cabral dos Santos