Governu Rekoñese Saláriu Décimo Terceiro Atraza no Presiza Hadi’a Jestaun

Hatutan.com, (31 Dezembru 2025), Díli– Vise Primeiru-Mimnistru, Ministru Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanamo Sabino, hatete, saláriu décimo terceiro ba funsionáriu sira laiha problema, maibé  presiza hadi’a jestaun de’it.

Lee Mós: Funsionáriu Balu iha Ajénsia TIC Timor, I.P La Simu Saláriu fulan-Novembru Bele To’o Tan Dezembru

Funsionáriu DNSPP halo protesta iha Ministériu Interiór, 30 Dezembru 2025. Foto/Juvinal Cabral dos Santos

“Saláriu décimo terceiro ne’e funsionariu hotu-hotu iha direitu, hotu-hotu sei garantia, problema jestaun de’it, ne’ebé sei haree, imi hotu hatene katak  saláriu décimo terceiro uluk-uluk ne’e iha Ministeiru Finansas (MF) la’ós iha Ministeiru ida-idak,” Mariano Assanami Sabino  hateten hodi responde jornalista sira hafoin partisipa komemorasaun Loron Nasional Eroi sira-nian ba dala-VIII iha Rotunda Prezidente Nicolau Lobato, Comoro,  Díli, Kuarta (31/12/2025).

Governante  ne’e esplika, maibé polítika ikus ne’e Leí muda para depois iha ministeiru hotu-hotu, entaun presiza re-ajusta de’it, ne’e la iha problema, ne’ebé ida ne’e presiza jestaun de’it.

“Durante ne’e la iha problema tanba ita prevé iha Ministeiru Finansas (MF), maibé agora dadauk iha kada ministeiru tenke jere, la iha tan funsionáriu kazuál, maibé ba oin ne’e ha’u hanoin la iha problema ona,” Mariano  Assanami Sabino hateten.

Iha  Tersa, 30 fulan-Dezembru tinan 2025, funsionariu Diresaun Nasionál Seguransa Patrimóniu  Públiku (DNSPP) halo protesta hasoru dirijente sira, inklui Ministru Interiór Francisco da Costa Guterres, tanba sira-nia osan ko’a no balun la tama, inklui sira seidauk hetan osan alimentasaun fulan-Dezembru ne’e nian.

Simão Ximenes, nu’udár pesoál funsionáriu DNSPP ne’ebé hola parte iha asaun protest ne’e hateten iha loron 13 fulan-Dezembru ne’e, Konsellu Ministru (KM) aprova ona saláriu décimo terceiro ba funsionariu públiku hotu, inklui funsionáriu sira administrasaun indireta nian, maibé osan ne’ebé tama iha sira-nia konta bankaria iha Segunda, 29 fulan-Dezembru ne’e ko’a hotu.

Nia hateten funsionáriu DNSPP balun simu deit saláriu décimo terceiro U$80.00 no balun $10.00 deit.  Tanba ne’e, sira nia parte halo protest husi husu justifikasuan husi superior sira.

Bazeia ba regra BNCTL nune’e osan $10 ne’ebé tama labele dada tanba ne’e administrasaun nian,  ne’ebé simu de’it mak resibu mais osan labele simu.

“Osan décimo terceiro ne’e la iha, agora dadauk ha’u kaer ne’e resivu BNCTL nian osan la iha, tanba ami nia kolega balun tama deit $70.00, balun  $80.00 no balun simu $100.00. Ne’e oinsá,” Simão Ximenes kestiona.

Ministru Interiór, Francisco da Costa Guterres, hasoru malu ho funsionáriu DNSPP ne’ebé halo protestu tanba sira-nia saláriu décimo terceiro ko’a, inklui osan alimentár fulan-Dezembru nian seidauk tama. Foto/Juvinal Cabral dos Santos

Sira preokupa mós osan alimentár nian kada fulan $75.00 ba kada pesoál, maibé iha fulan-Dezembru nian ne’e seidauk tranfere tama ba sira idaidak nia konta bankaria.  

Duarte Soares  ho nia maluk Lucio Correia nu’udár funsionáriu DNSPP husu husu ba ukun nain sira, liu-liu Primeiru Ministru (PM) no Vise-Primeiru Ministru atu haree asuntu ida-ne’e no haree mos gabinete sira ne’ebé hala’o servisu iha Ministeiru Interiór ne’ebé ko’a pesoál seguransa sivíl nia osan la iha justifikasaun.

“Ita boot kalkula took hanesan ha’u level 3 ha’u nia saláriu $200.00-resin, se simu $80.00 de’it, entaun $100.00-resin ne’e ba ne’ebé,” Duarte Soares   hateten.

Lucio Correia, haktuir iha loron 29 fulan-Dezembru ne’e nia ba  buka hatene nia saláriu décimo terceiro ne’e, maibé bainhira hatama kartaun ATM laiha osan.

“Entaun ami mai halo komfirmasaun razaun saida mak osan ami nia la tama no ko’a, atu husu sira nia esplikasaun,” Lucio Correia afirma.

Ministru Interiór (MI), Francisco da Costa Guterres,  ne’ebé hasoru  direta funsionáriu DNSPP sira ne’ebé halo protest ne’e hateten,  nia rekoñese osan ba alimentár fulan-Dezembru nian  seidauk, maibé sei rezolve iha tinan oin, fulan-Janeiru.

“Ita hotu la hetan, imi nia direitu osan alimentár falta fulan ida, sei selu hotu  no imi lalika preokupa, imi fiar ha’u, ita sei resolve,” Ministru Interiór Francisco da Costa Guterres hateten.

“Kona-bá kestaun tékniku balun ne’ebé mak iha  saláriu décimo terceiro ne’e, ami hotu la simu, so Polísia Nasional Timor-Leste (PNTL) mak simu ona, maibé agora dadauk ami servisu hela hodi rezolve.”

Jornalista: Juvinal Cabral dos Santos