PNTL Detein Suspeitu ida Tenta Kesi Ema Nia Kakorok

Hatutan.com, (02 Janeiru 2026), Díli-Polísia Nasionál Timor-Leste (PNTL) Munisípiu Díli, Kuarta (31/12/2025), detein suspeitu ho inisiál GSG ne’ebé lori tali tama abitante ida nia uma iha Aldeia 03, Suku Fatuhada, Postu Administrativu Dom Aleixo, Munisípiu Díli, tenta kesi vitíma nia kakorok.  

Suspeitu GSG ne’ebé lori tali tama abitante ida nia uma iha Aldeia 03, Suku Fatuhada, Postu Administrativu Dom Aleixo, Munisípiu Díli. Foto/Juvinal Cabral dos Santos

Iha kazu ne’e, vitímak hakfodak no hakilar hodu husu ajuda ba viziñu sira. Nune’e, komunidade sira sai hotu hodi kaer suspeitu GSG hodi informa ba Polísia no halo kedas detentasaun iha Polísia durante oras 72 nia laran.

“Iha kazu ida akontese iha Aldeia 03, Suku Fatuhada, suspeitu ida tenta tama ema nia uma sem autorizasaun, lori tali hodi kesi ema nia kakorok, maibé vitima hakilar viziñu sira sai hotu,  sira konsege kaer nune’e sira kontaktu Polísia ba kaptura kedas suspeitu detein  iha sela detensaun durante oras 72,” Komadante Polísia Munisípiu Díli, Superintendente Xefe Polísia Orlando Gomes, informa ba jornalista sira iha Eskuadra Dom Aleixo, Sesta (02/01/2026).

Polísia konsidera  kazu ne’e tentativa omesídiu, nune’e Polísia sei aprezenta suspeitu GSG ho idade tinan-22 ba Ministéiru Públiku (MP).

Jornalista: Juvinal Cabral dos Santos