FRETILIN Preokupa Funsionáriu Barak Halerik Ba Saláriu Décimo Terceiro

Hatutan.com, (05 Janeiru 2026), Díli– Bankada oposizaun FRETILIN  preokupa funsionáriu barak mak sei halerik ba  ho sira nia saláriu décimo terceiro ne’ebé seidauk rezolve husi Governu.

Lee Mós: Governu Rekoñese Saláriu Décimo Terceiro Atraza no Presiza Hadi’a Jestaun

Ministru Interiór, Francisco da Costa Guterres, hasoru malu ho funsionáriu DNSPP ne’ebé halo protestu tanba sira-nia saláriu décimo terceiro ko’a, inklui osan alimentár fulan-Dezembru nian seidauk tama. Foto/Juvinal Cabral dos Santos

Membru Parlamentu Nasionál husi Bankada FRETILIN, Antoninho Bianco hateten, Bankada FRETILIN simu informasaun barak loos kuazé husi  munisipiu hotu-hotu, balu hateten sira simu US$60.00, balu US$80.00 de’it, maibé antes ne’e balu simu to’o US$400.00 hanesan funsionáriu sira husi edukasun, entaun asaun ida-ne’e halo sira  sai vitima.

“Ami hanoin katak Governu haree took aspirasaun sira ne’ebé sai vitíma ne’e, sé saláriu décimo terceiro ne’e fó tuir hanesan ne’ebé mak iha, maibé agora derepente ko’a osan barak demais, entaun ne’e ema nia direitu. Ohin, iha plenária karik ami atu foti asuntu ne’e, maibé aproveita katak deputadu  sira husi bankada FRETILIN mós lamenta tanba kuitadu ita husi nivél nasionál balu hetan osan barak, maibé ema sira iha  nivél servidór iha área rural no funsionáriu sira hetan de’it fali  US$60.00 no  balu US$80.00. Ko’a osan maka’ás laiha justifikasaun  ida klaru,” Deputadu Antoninho Biaco ba Jornalista sira iha PN, Segunda (05/01/2026).

Reprezentante povu ne’e espera katak molok fulan-Janeiru ne’e, Governu bele iha ona solusaun no  bele fó fila-fali ema nia direitu, atu  labele halimar fali ho ema nian direitu.

“Ita Parlamentu Nasional, Membru Governu no orgaun selu-seluk hetan tiha, maibé ema sira munisípiu no  área rurál la hetan fali no husu Governu atu fó solusaun ba aspirasaun ida-ne’e,” Deputadu Antoninho Bianco afirma.

Iha fatin hanesan Deputada Helena Martins mós husi Bankada FRETILIN hateten katak kona-bá saláriu décimo terceiro aprova ona iha Konsellu-Ministru  tanba ne’e laiha razaun atu selu ema nia salariu décimo terceiro ne’e atraza.

“Ne’e ema nia direitu tenke fó, karik ko’a tenke ba kontesta iha rekursu umanu, iha Ministériu Finansa no Ministériu ida-idak tanba balu ko’a fali ema nian saláriu US$40.00 no balu ko’a to’o US$80.00 pior liután mak seguransa sivíl sira laiha fali osan,” Deputada Helena Martins lamenta.

Nia afirma hanesan estadu ida órgaun soberanu ida iha lei no konstituisaun ne’ebé sai matadalan ba ema hotu iha rai ida-ne’e atu la’o tuir, se lae mak estraga fali estabilidade iha rai ida-ne’e nian.

Funsiónariu sira ne’ebé sei preokupa ho saláriu décimo terceiro mak hanesan Instituisaun TIC Timor, Seguransa Sivíl iha Ministériu Interiór no mós profesór balu ne’ebé hala’o knaar iha munisípiu sira.

Jornalista: Zita Menezes