Nasionál
Durante 2025, Polísia Halo Apreensaun Ba Veíkulu Estadu 194
Hatutan.com, (08 Janeiru 2026), Díli- Durante perídu tinan 2025, Polísia Nasionál Timor-Leste (PNTL) liuhusi Diresaun Tránzitu Rodoviária Nasionál prende veíkulu Esradu hamutuk 194 tanba halo operasaun ba interese privadu.
Xefe Departamentu Koordensaun Jestaun Risku, Formasaun, Edukasaun Sívika, Superintendente Asistente Polísia, Domingos Sarmento Gama. Foto/Juvinal Cabral dos Santos
“Iha operasaun durante tinan 2025, ami halo apreensaun ba veíkulu (karreta ho motór) Estadu hamutuk 194 iha teritóriu Timor-Leste tanba halo operasaun ba interese privadu no la aprezenta dokumentu komprovadu husi instituisaun hodi halo operasuan iha loron la’ós servisu nian,” Xefe Departamentu Koordensaun Jestaun Risku, Formasaun, Edukasaun Sívika, Superintendente Asistente Polísia, Domingos Sarmento Gama, informa ba jornalista iha Komandu Jerál PNTL, Díli, Kinta(08/01/2026).
Dadús rekapitulasaun Polísia Diresaun Tránzitu Rodoviaria Nasionál kona-bá operasaun auto estop ba transporte sira iha 2025 hatudu mós katak autoridade Polísia prende veíkulu sira públiku no privadu hamutuk 24.136, kompostu husi veíkulu Estadu hamutuk 194, transporte privadu 16.702, transporte públiku 2.99 no prende mós dokumentu veíkulu sira-nian hamutuk 4.316.
Infratór sira ne’ebé Polísia fó sansaun hodi selu ona koima iha banku hamutuk 24.122, seidauk selu koima 1152, passa deklarasaun 406. Nune’e, Polísia halibur reseita hamutuk US$799,005.00.
“Motorista veíkulu Estadu nia sansaun maioria selu koima no submete mós relatóriu ba ministériu relevante atu bele aplika sansaun tuir regulamentu internal ba motorista sira ne’ebé utiliza veíkulu Estadu ba benefisia privadu.
PNTL mós rejista veíkulu sira ne’ebé tama-sai postu fronteira Batugade, Salele, Sakato ho Oesilo hamutuk 14.391 no reseita ba kaixa estadu hamutuk US$213,831.00.
Jornalista: Juvinal Cabral dos Santos