Tribunál Hala’o Julgamentu Interogatóriu Dahuluk Ba Reitór UNTL ho Direjente Na’in-Haat no Na’in-ida Halo Hela Tratamentu iha HNGV

Hatutan.com, (15 Janeiru 2026), Díli-Tribunál Judisiál Primeira Instánsia Díli (TJPID), Kinta (15/01/2026),  realiza julgamentu  interogatóriu dahuluk ba arguidu ho inisiál JM inklui diregente na’in-haat seluk husi Universidade Nasionál Timor-Lorosa’e (UNTL).

Lee Mós: PM Xanana Lamenta Tribunál Hasai Mandadu Buska no Detesaun Ba Reitór UNTL Cs

Tribunál hala’o primeira interrogatóriu ba reitór UNTL ho nia dirijente na’in-haat seluk no na’in-ida la bele partisipa tanba hala’o tratamentu iha HNGV, Kinta (15/01/2026). Foto/Juvinal Cabral dos Santos

Iha audénsia primeira interogatóriu dahuluk ne’ebé prezide husi Juiz turnu, Argentino Nunes ne’e, arguida ida ho inisial LSdA la marka prezensa tanba hala’o hela tratamentu (baixa) iha Ospitál Nasionál Guido Valadares (HNGV, sigla portugés).

Tribunál Judisiál Primeira Instánsia Díli (TJPID) tuir loloos realiza julgamentu  interogatóriu dahuluk ne’e ba arguidu na’in-neen  nu’udár dirijente iha estrutura Universidade Públiku ka UNTL, maibé arguida  ho inisial LSdA la partisipa tanba halo hela tratamentu saúde ka baixa iha sala VIP-HNGV ho kondisaun moras.

Julgamentu  interogatóriu dahuluk ne’e, Tribunál husu arguidu  ida-ida kona-bá hili direitu atu ko’alia no nonok, maibé arguida ho inisial JMM hili direitu nonok, no arguidu na’in-haat seluk hili direitu ko’alia, tanba ne’e Tribunál liu hosi Juiz Turnu, rona uluk arguidu Reitór UNTL  ho inisiál JM no arguidu TS.

Rona tiha arguidu na’in-rua ne’e, Tribunál deside muda fali audénsia  julgamentu interogatóriu dahuluk ne’e ba Sesta dadeer (16/01/2026), hale’u tuku 08:00 Otl, hodi kontinua prosesu julgamentu ba arguidu na’in-rua.

Tuir observasaun Hatutan.com,   TDPID katak  hale’u tuku 15:45  Otl  arguidu na’in-haat ho inisál JM, FQdC, MB, TS, no arguida JMM, sira hamutuk na’in-lima uza roupa detidu to’o iha  Tribunal Judisial Primeira Instansia Díli (TJPID) hodi tuir  interogatóriu dahuluk.

Iha julgamentu  interogatóriu  dahuluk ba arguidu na’in-lima ne’e akompaña mós husi trutura, funsionáriu, no gabinete média UNTL, inklui estudante finalista UNTL balun.

Bainhira arguidu sira atu tama ba sala prinsipal 48  interrogatóriu dahuluk nian, família no estrutura UNTL hadau malu iha odamatan hakarak atu partisipa hotu audéndia Primeira Interrogatóriu ne’e, maibé parte autoridade seguransa Polísia informa ba sira kona-bá regra balun nune’e labele partisipa hotu.

Audénsia  julgamentu interrogatóriu dahuluk ne’e, prezide hosi Juiz turnu, Argentino Nunes,  Ministériu Públiku reprezenta Prokuradór, Matias Soares, no kada arguidu hetan asistensia legal husi advogadu privadu no Defensor Públiku.

Jornalista: Juvinal Cabral dos Santos