PTR Afonso Carmona Respeita Dezisaun Tribunál Hasai Mandadu Buska no Detensaun Ba Reitór UNTL Cs

Hatutan.com, (16 Janeiru 2026), Díli– Prezidente Tribunál Rekursu (PTR), Afonso Carmona hateten, nia parte la fó koméntariu  no respeita ba dezisaun Tribunál  Judisiál Primeira Instánsia Díli (TJPID) nian ne’ebé  hasai mandadu buska, apreensaun no detensaun ba   Reitór Universidade Nasionál Timor-Lorosa’e (UNTL) ho inisiál  JM  hamutuk ho nia vise-reitór no kargu xefia na’in-haat tan.

Lee Mós: PM Xanana Lamenta Tribunál Hasai Mandadu Buska no Detesaun Ba Reitór UNTL Cs

Prezidente Tribunál Rekursu (PTR) Afonso Carmona. Foto/Zita Menezes

“Ida-ne’e liga ho prosesu, ha’u sei la fó komentáriu, imi hatene tiha ona  estudante UNTL sira mós halo tiha ona, ha’u dehan ha’u sei la komentáriu tanba liga ho prosesu la’o hela, ita labele koméntariu prosesu ne’ebé la’o hela, juís ida kaer rasik mós nia labele kométariu só advogadu karik bele tanba nia atu defende nia kliente,” PTR Afonso Carmona  hateten hodi responde jornalista sira iha Parlamentu Nasionál, Sesta (16/01/2025).

Prezidente Tribunál Rekursu (PTR) Afonso Carmona hateten, nia razaun  la fó koméntariu ba kazu referé tanba nia reprezenta Tribunál Rekursu.

“Tanba ha’u tribunál,  kuandu ha’u ko’alia signifiká iha desizaun tiha  ona, entaun ema la sala mós ha’u koméntariu tina ona, nia sala ona, komprende, ka nia sala hela ha’u ko’alia loos nia loos hela mais realidade nia sala. Tanba ne’e, Tribunál la bele fó koméntariu ba prosesu ne’ebé la’o hela, tanba ha’u labele viola regra,” PTR Afonso Carmona hateten.

Iha Tersa, 13 fulan-Janeiru  tinan 2026, Polísia Nasionál Timor-Leste (PNTL) liuhusi Diresaun  Investigasaun Kriminál Nasionál  (DIKN) ezekuta mandadu TJPID ho NUC: 086/25-PNSIK hodi halo buska, apreensaun no detensaun ba Reitór UNTL ho inisiál JM no Vise-Reitór,  inklui kargu xefia na’in-haat seluk tanba deskonfia envolve iha kazu abuzu poder no partisipasaun ekonomia.

Jornalista: Zita Menezes