Justisa & Krime
PCIC Seidauk Foti Medida Disiplinár Bá OdCA Utiliza Pistola Halo Violensia Doméstika
Hatutan.com, (22 Janeiru 2026), Díli– Polísia Sientífiku Ivestigasaun Kriminál (PCIC-sigla portugés), seidauk foti medida disiplinár bá membru PCIC ho inisiál OdCA ne’ebé utiliza pistlola hodi halo violénsia doméstika.
Logotipu PCIC
Portavós PCIC, Mário Tavares bá Hatutan.com iha edifisiu PCIC, Kinta (22/01/2026) informa katak, nia sente hakfodak uitoan banhira rona katak membru PCIC ho inisiál OdCA lori arma hodi ameiasa niania fen-kaben.
“Atu informa de’it katak ha’u hanoin prosesu NUC mós ita-boot sira Hatutan.com hatene, tanba ha’u asesu informasaun husi ita-boot sira nia notisia, katak prosesu kazu ne’e rejista tiha ona ho NUC:001/26.PCIC, sei ha’u la sala,” portavós PCIC, Mário Tavares informa.
Nia afirma, se kazu ne’e rejista ona iha Ministériu Públiku, hothotu hein prosesu, tanba krime violénsia doméstika ne’e kompetensia Polísia Nasionál Timor-Leste (PNTL) sei halo ivestigasaun.
Nia subliña, maibé tuir Prinsipiu depende bá Ministériu Públiku, bele uza autonomia halo rasik ivestigasaun.
“Kona-bá faktus ne’ebé akontese, ha’u husu dekulpa, ha’u la bele pronúnsia, membru PCIC ne’e uza duni arma ka lae, depois investigasaun la’o maka ita haree,” nia hateten tan.
Nia dehan, tanba prosesu kime ne’e buat seluk, no prosesu disiplinár ne’e oin seluk, tanba sirkunstansia bá krime ne’e violénsia doméstika, sirkunstansia, akontese iha suspeitu nia uma la’ós akontese iha PCIC.
“Ha’u iha serteza katak, difisil atu loke bá prosesu disiplinár, agora sei karik rezultadu instvestigasaun husi Ministériu Públiku komprova duni, katak nia lori arma hodi ameiasa nia ferik-oan, maka ita haree took ninia prosesu disiplinár karik bele loke,” nia afirma.
“Imi konfirma didi’ak imi nia fontes sira ne’e, nia lori duni arma estadu ka lae, tanba ha’u la bele hatete iha ne’e katak nia lori arma Estadu hodi ameiasa nia fen-kaben,” tenik nia.
Kona-bá orientasaun Ministru Justisa Sérgio da Costa Hornai husu bá PCIC atu loke prosesu disiplinár bá kazu ne’e, depende Diretór Nasionál Polísia Sientífiku Ivestigasaun Kriminál Vicente Fernandes e Brito.
“Loke prosesu disiplinár bá membru PCIC refere depende komunikasaun Ministru ho Diretór PCIC, se sira nia komunikasaun, dehan hatun despaisu hodi loke prosesu disiplinár, sira nia gabinte prosesu disiplinár bele loke prosesu,” nia afirma.
Hanesan Portavós bá PCIC, sei buka informasaun ho gabinte inspirasaun prosesu disiplinár hodi rona mós imformasaun relasiona ho kazu violénsia doméstika ne’e.
Fó hanoin fila fali katak, informasaun ne’ebé Hatutan.com asesu katak iha loron 02 fulan-Janeiru 2026, membru PCIC ho inisiál OdCA halo violénsia no uza arma pistola amiasa nia-kaben ho inisiál DX hanesan mós membru PCIC.
Kazu refere vitíma nu’udár OdCA nia ferik-oan halo keixa no rezista ona iha Ministériu Publiku ho Nuk:001/26.PCIC.
Membru PCIC OdCA ho kondisaun lanu halo violénsia domestika no amesa ho pistola hasoru nia kaben DX no oan na’in-rua la ho razaun klaru, depois vítima kontaktu bá Komisáriu PCIC hodi informa no ekipa prevensaun bá foti vítima hodi halo prosesu hasoru membru refere.
Membu PCIC ho inisiál OdCA ne’e iha hela prosesu kriminál antesende no disiplinar husi PCIC no Tribunál, maibé kontinua halo krime doméstika hasoru nia kaben.
Jornalista: Marcelino Tomae