Rai Makmor La Kumpri Promesa Devolve Vitíma Sira-Nia Osan

Hatutan.com, (26 Janeiru 2026), Díli-Inisiadór  no Prezidente kompañia Rai Makmor. Lda, Armando Ximenes la kumpri promesa devolve vitíma na’in-90 nia osan.

Lee Mós: Deskonfia Kompañia Raimakmor Halo Fraude, Vitíma Na’in-92 Halo Keixa iha Polísia

Polísia lori inisiadór empreza Rai Makmor. Lda, Armando Ximenes hasoru malu ho vitíma sira atu bele garante solusaun devolve vitíma sira-nia osan, Segunda (26/01/2026). Foto/Juvinal Cabral dos Santos

Iha loron 16 fulan-Dezembru tinan 2025 perante Polísia Nasionál Timor-Leste (PNTL), Eskuadra Polísia Vera Kruz, Díli, halo mediasaun entre Prezidente kompañia Rai Makmor. Lda, Armando Ximenes, ne’ebé ikus mai iha konkordansia hodi asina karta kompromisu ho vitíma na’in-90, katak iha loron 26 fulan-Janeiru, tinan ne’e, nia parte devolve hotu vitíma sira-nia osan, maibé to’o agora promesa ne’e la sai realidade. Nune’e, vitíma sira hamutuk na’in-200 halibur malu iha Ekuadra Polísia Vera Kruz hodi husu Polísia nia intervensaun atu Armando Ximenes kumpre nia prosesa devolve vitíma sira-nia osan.

“Ami mai ne’e  tanba  kompañia Rai Makmor, Lda durante tinan ida ho fulan balun ona, sira  loke kompañia ne’e katak ami hatama US$135.00 ami sei hetan fali US$1000.00 ba interese negosiu, sé negosiante sira a bele hatama nia osan iha kompañia Rai Makmor, Lda A bele hetan osan US$1000.00 ne’e para hodi fila liman,” vitíma husi Munisípiu Díli, Julianos Lopes dos Santos, ba joranlista sira iha resintu Eskuadra Polísia Vera Kruz.

Nia hateten, iha ikus mosu problema ba kompañia ida-ne’e iha povu barak kuaze munisípiu 13 ne’e  la satisfás ho programa ida-ne’e .

Nia fó sasin katak, na’in bá kompania Rai Makmor. e’e bosok ema dala barak, tanba kontaktu nia sempre hatan de’it katak kestaun imi nia sei resolve no antes ne’e nia promete halo akordu ida katak Segunda (26/01/2026) kompañia reembolsa sira ne’ebé lakohi no hakarak sai ne’e fó fali nia osan.

“Sé mak hakarak foti fali nia osan, bele foti fali, maibé to’o ohin loron la hetan. Ida-ne’e ami esforsu nafatin, ami hakarak ko’alia ba ami nia seguransa PNTL esforsu buka nia, ami la halo problema ho nia, ami la odiu  nia, tenke lori fali ami nia osan mai, sé hatama duni ami nia osan iha BNCTL lori fali ami nia osan mai,” Julianos Lopes dos Santos azije.

Vitíma sira husu PNTL tenke kaer lori na’in kompania ne’e deklara ba ema rihun ba rihun ne’e bele rona desizaun husi Prezidente kompañia Rai Makmor hodi devolve osan benefisiariu sira nian.

Apolinario da Silva, nu’udár vitíma husi Munisípiu Manufahi hkatuir, nia lori ema na’in-10 hodi tama iha kompañia Rai Makmor tanba husi kompañia sira dehan hatama  US$100.00 fó US$1000.00 sé mak hatama US$1000.00 simu fali US$10,000.00, no sé mak hatama US$2,000.00 sei hetan fali US$20,000.00. Tanba ne’e,  Apolinario da Silva lori ema na’in-10 registu iha kompañia Rai Makmor, momentu ne’e nia promete dehan iha loron 26 fulan-Janeiru  tinan 2026, tenke mai rezolve iha kantor polísia.

Prezidente kompañia Rai Makmor.Lda, Armando Ximenes, parte lokraik to’o Eskuadra Polísia Vera Kruz hateten, nia buka dalan atu oinsá rezolve problema ne’ebé parte  sira enfrenta, nia deklara prontu buka dalan oin-oin.

“Ne’ebé ohin halo konkordansia katak Tersa 27 fulan-Janeiru ne’e, estrutura sira ne’e mai hotu mak resolve. Ha’u mak buka dalan ba mai oinsá para atu rezolve, ha’u prontu ha’u mak inisia, maibé la’ós ha’u mak kaer direta osan, aban bolu hotu estrutura mai nasionál hodi verifika imi nia lista, verifika imi nia osan, ami foti desizaun iha Polísia nia oin sei responsabiliza para rezolve problema ne’e,” Armando Ximenes  hateten iha Eskuadra Polísia Vera Kruz.

Nia esplika, osan ezekusaun balun la hetan, maibé balun la’o hela, la’ós osan de’it, sasan karreta,  motór mós la’o hela.

“Ita garantia hela maibé responsabilidade ne’e ida-idak, ha’u nu’udar inisiador maibé estrutura sira mai para ami esplika hamutuk,” Armando Ximenes hateten.

Liga ho kazu ne’e Komandante Polísia Eskuadra Vera Kruz, Inspetór Xefe Polísia  Ernesto da C. Guterres esplika, sidadaun sira ne’ebé konsentra iha Eskuadra Polísia Vera Kruz liga ho investimentu  sira ne’ebé mak iha liuhusi kompañia Rai Makmor.

Nia salienta, parte husi kompañia katak bainhira sira registu ona sira mós bele asesu ba iha kreditu ne’e depende ba iha montante sira ne’ebé esplika ba sidadaun sira diferente ba Munisípiu Aileu, Same, Bobonaro, Liquiça, Ermera, no seluk tan ne’ebé iha li’ur ne’e.

“Informasaun ne’ebé husi kompania Rai Makmor, Lda ba komunidade sira katak bainhira hatama US$100.00 bele asesu kreditu semana ida bele hetan US$1000.00, husi montante ne’ebé mak iha atrai ema para oinsá mak ema bele fiar, liu husi aproximasaun no esplikasaun ne’e halo ema kontenti sente di’ak  ema hotu-hotu hakarak atu tama no asesu ba kreditu,” Inspetór Xefe Polísia Ernesto da C. Guterres esplika.

Nia dehan, ema sira tama iha kompañia Rai Makmor balun hatama osan to’o US$30,000.00 to’oUS$50,000.00 mós iha to’o balun fa’an hotu karreta, ai-horis, sasán sira para bele partisipa iha kreditu, kompañia refere esplika ba sidadaun sira katak prosesu kreditu ne’e semana ida ka rua de’it.

“Mais ikus fali promesa ba ema ne’e la sai realidade, tanba ne’e mak hahú husi loron 12 fulan-Dezembru 2025, ema sira ne’e hahú ona levanta problema iha polísia oinsá mak bele prosesu, husi informasaun sira ne’e ita komunika parte kompañia halo oinsá mak mai halo atendimentu ba sidadaun sira ne’ebé mak  mai polísia nian,” nia afirma.

Autoridade seguransa hahú registu ba sidadaun sira ne’ebé mai iha edifisiu PNTL no buka solusaun ba parte rua hodi simu malu hodi halo pagamentu, ida ne’e mak prosesu primeiru polísia halo liuhusi aproximasaun ikus mai halo akordu.

“Akordu mak la iha solusaun iha dalan seluk ita orienta komunidade sira atu oinsá bele kontinua loke prosesu entaun tenke halo keixa, prosesu keixa ida bele iha Polísia no ida seluk ita bele haruka sira diretamente ba keixa iha Ministériu Públiku (MP),” Inspetór Xefe Polísia Ernesto da C. Guterres esplika.

Rekorda fali katak, Karta akordu ne’ebé Hatutan.com asesu, hatudu katak ne’e asina husi responsavel másimu, prezidente ka Inisiador Kompañia Raimakmor L.da., Armando Ximenes, Xefe Diretor Investimentu Martinho de Sá, Vise Presidente komisariu, José Luis da Costa Oliveira, Direktora Finansas Goreti Efendy Maria, hodi  kompromete rembolsa vitíma sira-nia osan iha loron 26 fulan-Janeiru 2026.

Karta akordu halo iha Tersa, 16 Dezembru 2025,  tuku 12:00 Otl, Diretor hamutuk ho Estrutura kompañia Raimakmor Lda halo akordu ida ne’e iha edifisiu PNTL hodi deklara katak, dividas husi membru kompañia sira ne’ebé atu rezigna an husi kompañia Raimakmor kompromete devolve ka reembolsa.

“Ami estrutura prontu reenbolsa ka devolve osan ne’ebé kliente sira hakarak sai ka rezigna an husi kompañia Rai Makmor Lda , ho nune’e kompañia sei halo pagamentu iha dia loron 26 fulan-Janeiru  tinan 2026.”

Prosesu pagamentu sei tuir lista ne’ebé iha aneksa tuir dokumentus konprativas. Sekarik maka la rezolve kompañia ho estrutura sira sei toma responsabilidade tuir lei ne’ebe maka vigora.

Joranlista: Juvinal Cabral dos Santos