Konsellu Ministru Aprová Projetu Rezolusaun Kona-Bá Konta Satélite Tasi Nian

Hatutan.com, (20 Fevereiru 2026), Díli– Konsellu Ministru, Sesta (20/02/2026), aprová projetu rezolusaun Governu ne’ebé aprezenta hosi Primeiru-Ministru Kay Rala Xanana Gusmão  kona-bá Konta Satélite Tasi nian.

PM Xanana Gusmão lidera Reuniaun Konsellu Ministru iha Salaun Ministériu Finasas, Díli, Sesta (20/02/2026). Foto/Média GPM

Objetivu hosi Rezolusaun Governu ida-ne’e mak atu implementa Pilár 15 hosi Polítika no Planu Asaun Ekonomia Azul, hodi kria baze ba implementasaun Konta Satélite Tasi nian, nu’udar instrumentu estatístiku ne’ebé dezeña atu sukat ho rigór kontribuisaun hosi ekonomia tasi nian ba ekonomia nasionál.

Iha komunikadu imprensa ne’ebé Hatutan.com asesa husi portal governu haktuir katak Konta Satélite Tasi nian sei permite rekolla, organizasaun, no análize dadus kona-ba despeza públika no, iha etapa tuirmai, kona-ba atividade ekonómika públika no privada ne’ebé relasiona ho setór tasi nian, hodi integra informasaun ne’e iha Konta Nasionál sira.

Diresaun-Jerál Planeamentu Orsamentál no Institutu Nasionál Estatístika Timor-Leste,I.P, servisu hamutuk ho Gabinete Fronteira Maritima, sei define metodolojia, indikadór ekonómiku relevante sira, no mós mekanizmu rekolla no prosesamentu dadus ne’ebé nesesáriu.

Prevee mós katak, iha prazu fulan neen nia laran hafoin rezolusaun tama iha vigór, sei aprezenta relatóriu ida ba Ministra Finansas no Primeiru-Ministru kona-ba pontu situasaun obra nian no roteiru ida ba estabelesimentu Konta Satélite Tasi nian, no mós konsolidasaun markadór orsamentál ba Ekonomia Tasi iha Orsamentu Jerál Estadu nian hahú hosi tinan 2027 ba oin.

Jornalista : Zita Menezes