Udan-Boot iha Díli, Xefe Família 26 Afetadu no Uma Rua Rai Taka

Hatutan.com, (23 Fevereiru 2026), Díli– Sekretáriu Estadu Protesaun Sivíl, Domingos Mariano Reis, informa dadus provizóriu husi Autoridade Protesaun Sivíl (APC) relasiona ho  udan  ho intensidade forte e’ebé akontese iha kapitál Díli, 22 fulan-Fevereiru ne’e, rezulta  família uma-kain 26 afetadu no uma rua rai taka iha Meti-aut.

Udan ho intensidade forte iha kapitál Díli, Domingu (22/02/2026), halo bee nalihun maka’ár iha áre Colmera no fatin seluk tan. Foto/Juvinal Cabral dos Santos

“Udan  oras rua  to’o tolu nia laran konsegé, afeta área sira hanesan  Caicoli, Metiaut, Bairu-Pité, Vila-Verde. Totál família  ne’ebé afeta 26 husi ema adultu 74,  labarik hamutuk 36, nune’e total membru familia 110,” Domingos Mariano Reis informa ba jornalista sira iha Ministériu Finansas, Díli, Segunda (23/02/2026).

Ekipa APC  evakua kedan família sira ne’ebé afetadu ba iha sentru Autoridade Protesaun Sivíl hodi hetan asisténsia direita no família uma-kain rua iha Meti-aut ne’ebé rai taka avakua hotu ona.

Nia afirma ekipa operasaun protesaun sivíl halo kedan monitorizasaun hale’u Díli laran ba kauza husi dezastre naturá ne’ebé akontese ho  grau  kiik no APC iha kbiit atu bele responde.

Nia hatutan tán katak udan ho intensidade boot  akontese mós iha Munisipíu Manufahi Bobonaro, no mós husi kosta-sul, nune’e APC mós  sei hein relatóriu husi Munisipíu sira ne’ebé mak akontese  udan.

Governu liuhusi Sekretáriu Estadu Protesaun Sivíl, Domingos Mariano Reis, husu ba komunidade sira tenke iha konsiénsia atu so’e lixu iha nia fatin, tanba APC hamutuk ho Primeiru-Ministru Kay Rala Xanana Gusmão halo limpeza iha tasi-ibun Praia dos Coqueiros, hatudu kuaze lixu ne’ebé naklekar iha tasi-ibun ne’e aqua mamuk, klaeng no plástiku sira mak barak.

Jornalista : Zita Menezes