BCTL Halo Hela Ezersisiu Interna Kona-bá Timor-Leste Nia Moeda Rasik

Hatutan.com, (26 Fevereiru 2026), Díli-Governadór  Banku Sentrál Timor-Leste (BCTL), Hélder Lopes, afirma BCTL agora daudaun hahú halo diskusaun interna hodi Timor-Leste bele iha tán moeda rasik.

Lee Mós:  2025, Timor-Leste Nian Osan Millaun US$841 Sai Ba Rai-Li’ur

Governadór BCTL, Helder Lopes. Foto/dok

“Sobre ita nian moeda rasik, diskusaun interna ami halo ona, mais atu iha moeda rasik ne’e la fasil, moeda ne’e atu serve ita nia ekonomia, tanba ne’e mak desizaun atu kria moeda rasik ha’u tenke koloká ida-ne’e ho didi’ak. Desizaun Timor-Leste atu iha moeda rasik ne’e desizaun politiká, jestaun moeda mak banku sentrál nian, tanba banku sentrál iha mandatu atu halo jestaun moeda,” Governadór BCTL Hélder Lopes ba jornalista sira iha PN, Kinta (26/02/2026).

 Daudaun  ne’e BCTL halo hela preparasaun interna liuliu prepara roteiru ba iha futuru, eventualmente Timor-Leste bele iha moeda rasik

“Karik ita pelemenus iha ona roteiru para ita la’o tuir ida-ne’e mak ami uza hodi fó advokasia ba konsulta ita nian na’i ulun sira, katak ita iha moeda rasik iha futuru ita presiza prenxe kondisaun balu, mak iha ne’ebá dehan se karik iha vizaun  ita servisu hamutuk hadi’a kondisaun atu nune’e aban-bainrua ita iha moeda rasik depois ita servisu hamutuk  Banku Sentrál, Governu sentrál no entidade relevante sira tuur hamutuk hodi preinxe ba kondisaun ne’ebé ita presiza atu eventulamente ita bele iha moeda rasik,” nia tenik.

Governadór Banku Sentrál ne’e afirma,  agora daudaun BCTL halo mak kontinua hakbiit BCTL ninian kapasidade instituisional kontinua dezemvolve industria finanseira atu nune’e nia iha sistema infraestrutura ne’ebé propriu para abanbainrua Timor-Leste iha moeda rasik karik bele fasilita depois prepra roteiru ne’ebé bele gia hodi servisu iha futuru.

Nia hatutan, daudaun ne’e BCTL labele define tempu atu kria moeda, tanba  daudaun ne’e Timor-Leste uza  US$ (Dolar Amerikanu) fó benefisiu lubuk ida mai ekonomia Timor-Leste  tanba ne’e mak desizaun Timor-Leste iha moeda rasik tenke halo ho graduadu no tetu didi’ak.

Jornalista : Zita Menezes