Loja Sira iha Kapitál Díli La Koloka Pesoál Estasionamentu Sei Aplika Sansaun

Hatutan.com, (26 Fevereiru 2026), Díli-Diresaun Nasionál Transporte no Terrestre (DNTT) ho Polísia Nasionál Timor-Leste (PNTL) liu husi Diresaun Tránzitu Seguransa Rodoviária Nasionál, sei foti sasan administrative ka fó multa ho montante US$45.00 ba loja sira iha kapitál Díli ne’ebé seidauk koloka pesoal estasionamentu iha loja oin atu ordena transporte kompradór sira nian.

DNTT ho PNTL aviza ba loja na’in sira koloka pesoál estasionamentu iha loja oin. Foto/Juvinal Cabral dos Santos

Sirkular konjunta, Polísia Nasionál Timor-Leste (PNTL), liu husi Diresaun Tránzitu Seguransa Rodoviária ho Ministériu Transporte no Telekomunikasaun (MTK), liu husi Diresaun Nasionál Transporte no Terestre (DNTT) ho loja na’in sira, iha loron 15 fulan-Abríl 2025, ko’alia kona-bá loja sira iha obrigasaun atu koloka pesoál estasionamentu ho objetivu atu garante ordenamentu estasionamentu iha ida-idak nia loja oin.

Diretora Nasionál Transporte no Terrestre, Maria Antónia Vitór da Costa, husu loja na’in sira atu rekruta pesoál parajen hodi regula estasionamentu ba transporte kompradór  sira nian.

Nia afirma  bainhira loja na’in isra  la kumpri no mosu engarafamentu loja oin, sei halo atuasaun ka  prega multa ba loja na’in US$45.00.

“Ita husu ba loja na’in sira kumpri sirkular ne’ebé sirkula tiha ona ba loja na’in sira hotu-hotu iha kapitál Díli, atu nune’e, sira bele organiza parajen,” Maria Antónia Vitór da Costa,  hateten ba jornalista sira iha nia knaar fatin, Balide, Díli, Kinta (26/02/2026).

Diretora Nasionál DNTT ne’e esplika, objetivu sirkular ne’e eziji loja na’in sira atu rekruta pesoál estasionamentu atu  organiza parajen iha loja oin sira ne’e  hodi evita engarafamentu.

Diresaun Nasionál Transporte Terrestre sei monotroriza loja  sira ne’ebé iha ona pesoál estasionamentu no sira ne’ebé seidauk iha nafatin fó hanoin hodi rekruta lalais pesoál estasionamentu  hodi bele organiza fatin ba parajen sira iha idaidak nia loja oin.

Diretór  Tranzitu Seguransa Rodaviáriu Nasionál (DTSRN), Superitendete Xefe Polísia, António Mauluta, fundamenta tan katak durante ne’e Tranzitu ho DNTT fó ona formasaun ba pesoál estasionamentu kada loja iha Díli laran no mós fó avizu,  inklui  hasai sirkular konjunta DNTT ho PNTL atu loja na’in sira kolopa pesoál estasionamentu iha loja oin.

“Ba oin ami  halo atuasaun no  bainhira sira la kumpri  DNTT ho PNTL sei prega multa ba loja ida-idak,” Superintendente Xefe Polísia António Mauluta afirma.

Durante ne’e Polisia Tranzitu  fó avizu beibeik ba loja nain sira, maibé iha loja barak liu-liu iha parte Audian sira hahú organiza ona ba fatin parajen ho di’ak, maibe iha loja balun maka seidauk kumpri, nune’e liu husi sirkular ne’ebé fo sai ona ba públiku, maka loja na’in sira tenke kumpri koloka pesoál estasionamentu iha loja oin hodi evita engarafamentu ho asidente.

Ofisiál parajen loja nian ne’e, sira nia funsaun atu kontrola para de’it la’ós husu osan atu selu, no sira atu tau-matan ba transporte kompradór sira nian ho seguru.

Menejer loja  Globál Electrinic Al Amin, iha nia knaar fatin Kolmera, ba jornalista sira afirma, nia sente halo estasionamentu ne’e di’ak liután tuir regras para labele hamosu engarafamentu iha estrada.

“Ida-ne’e di’ak tanba ema balun kuandu mai garis la iha ne’e mai para double, depois sira para arbiru de’it ne’e bele hamosu esgarafamentu,” AI amin hateten .

Tuir nia, dala barak ema para tiha dalaruma polísia sira mai husu mós sira hatan iha ne’e garis la iha ne’ebé para de’it, entaun ne’e problema.

Nia rekomenda, karik ema balun mai para maibé mak la tuir regra ne’e mós polísia sira tenke ajuda no atua, tanba dalaruma ema hotu-hotu la hanesan bainhira pesoal parajen hasee labele para sira hirus.

Jornalista: Juvinal Cabral dos Santos