PNTL Halo Apreensaun Ba Sigaru Ilísitu Marlboro Kaixa-50 iha Kasnafar

Hatutan.com, (27 Fevereiru 2026), Díli-Polísia Nasionál Timor-Leste (PNTL)  liuhusi ekipa integradu husi Unidade Polísia Maritima (UPM), Diresaun Servisu Investigasaun Kriminál (DSIK)  no ekipa intelejensia halo apreensaun ba sigaru ilísiu Marlboro kaixa-50 iha área Kasnafar.

Autoridade Polísia halo apreensaun ba sigaru ilísitu marka Marlboro. Foto/Juvinal Cabral dos Santos

“Kinta kalan (26/02/2026), tuku 19:30 Ot,l ita nia ekipa integradu husi Unidade Polísia Marítima (UPM) no Intelejensia sira deteta katak movimentu informasaun ne’ebé mak ita rekolla husi parte rai-klaran, iha movimentu  ne’ebé mak ita suspeitu katak sira involve iha krime organizadu ho importasaun ilegal ba sasán merkadoria ne’ebé mak ita bandu,” Portavós PNTL Superintendente Polísia João Belo dos Reis, informa ba jornalista sira iha sala konferensia Komandu Jerál PNTL, Sesta (27/02/2026).

Portavós PNTL ne’e haktuir, autoridade seguransa hapara sidadaun Timoroan ida ho naran inisial FTFM kondus karreta iha parte Kasnafar mota ulun nian karreta  mini Bus marka nissan ida ho númeru matrikula C.10.579 TL detekta tula sigaru  ilísitu Marlboro.

“Ita konsege detekta iha Mini Bus laran sasán ilegal sigaru Marlboro kaixa-50, ne’ebé deskonfia hatama iha tasi mane nian, agora dadaun suspeitu ne’ebé tula sasán ne’e mai no mós karreta ne’ebé tula sasán ne’e agora daudaun para iha parte Investigasaun Kriminál hodi submete ba prosesu investigasaun,”  Superintendente Polísia, João Belo dos Reis informa.

Nia dehan, ida tula sasán sigaru ilegal ne’e hanesan kondutór de’it na’in loloos ne’e sei iha prosesu investigasaun mai.

Superintendente Polísia, João Belo dos Reis, hateten, servisu intelejensia no servisu integradu sira seluk sei buka tuir nafatin tanba sigaru ilegal sira modelu transportasaun ne’e la’ós primeiraves tama Díli.

“Entaun ita sei buka tuir sigaru sira ne’e nia paradeiru iha ne’ebé se mak uja no sé mak rai ita sei buka tuir”, Portavós hatutan.

Nia dehan, sigaru Marboro importasaun legál ne’ebe mak kompania na’in ba sigaru ne’e regista iha governu ne’e legálmente, maibé iha fali produsaun seluk la legál tenta hatama produtu sira ne’e liuhusi dalan ilegal mai Timor-Leste.

Portavós PNTL haktuir, ekipa forsa konjunta dadaun halo servisu iha tereinu kontinua buka evidensia  sigaru sira ne’ebé laos Marlboro original, tanba iha informasaun sasan sira ne’e tama mai territoriu Timor-Leste dala barak ona.

Jornalista: Juvinal Cabral dos Santos