Ofisiál PNTL ho Idade Reforma Labele Kompete Vaga Komisáriu Jerál

Hatutan.com, (02 Marsu 2026), Díli- Fundasaun Mahein (FM)  propoin atu nomeasaun ba kargu Komisáriu Jerál Polísia Nasionál Timor-Leste (PNTL) tenke respeita ba lejislasaun ne’ebé aplikabel. Ho nune’e, sira ne’ebé ho idade tinan 60 tenke tama reforma no la bele nomeia ba Komisáriu Jerál.

Diretór Ezekutivu Fundasaun Mahein, Nelson Belo. Foto/Juvinal Cabral dos Santos

Diretór Ezekutivu FM, Nelson Belo, nota katak, dadaun ne’e polísia ho postu Superintendente-Xefe barak mak idade avansadu ona ba prosesu reforma no sei la preinxe rekijitu tuir lei atu bele hetan promosaun no nomeasaun ba vaga Komisáriu Jerál tanba tuir Dekretu-Lei nú. 35/2024 artigu 63° kona-ba limite ba idade, artigu 63° ofisiál-direjenti no ofisial-superiór sira to’o de’it iha idade tinan60 tenke reforma, no ofisial-direjenti ne’ebé liu tinan 60  uluk governu anteriór reforma.

“FM nia rekomendasaun mak tenke rona Konsellu Superiór Polísia atu bele hatene kona-bá ofisiál dirijente no superiór ne’ebé halo hela knaar kuandu halo nomeasaun ba Superientedente-xefe ne’ebé dadaun ne’e iha lubuk ida, maibé balun iha ona idade apozentasaun no tuir Dekretu Leí no.35/2024 iha artigu 63° ne’ebé limite idade-60 liu labele kompete iha vaga Komisáriu Jerál no segundu Komisáriu Jerál inklui mós sira ne’ebe reforma tiha ona iha governu anterior,” Diretór Ezekutivu Fundasaun Mahein (FM), Nelson Belo, ba jornalista sira iha nia knar fatin, Díli, Segunda (02/03/2026).

Diretór Fundasaun Mahein (FM) konsidera nomeasaun ba komisáriu jerál no segundu komisáriu jerál sei la komprimenta ba lei órganika no lei estatuta Polísia Nasionál Timor-Leste (PNTL) tanba tuir kadeia kamandu nian ofisiál dirijente superiór ne’ebé atu troka vaga komadante no segundu komadante jerál laiha.

Ministériu Interiór (MI)  tenke rona no halo konsultasaun ba komisáriu jerál iha enkontru konsellu superiór polísial nian, nune’e mós tinan barak ona polítika sira politiza de’it insituisaun PNTL la tuir lei organika no estatutu PNTL nian. 

Nelson Belo informa tuir lei organiku PNTL numeiru 4/2024 kona-bá asuntu operasional no institusional, Ministériu Interiór tenke rona no halo konsultasaun ba ofisiál dirijente superiór PNTL nian liuhusi enkontru Konsellu Superiór polísia nian.

Nia informa to’o oras ne’e Ministériu Interiór seidauk halo hodi rona dirijente susperiór kona-bá dezempeñu ofisiál dirijente no superior nian, nune’e ba asuntu nomeasaun komadante jerál no segundu komadante jerál iha hela tendénsia politizasaun nia laran, nunee FM deskonfia katak iha ignoransia ba lei organika no estatutu PNTL nian númeru 35/2024 tanba ne’e husi análize husi FM ba lei estatutu PNTL nian iha artigu 47°.

Análize seluk tan ho Dekretu-Lei nú. 35/2024 artigu 131°, atu promove ba komisáriu persiza halo serbisu pelu-menus tempu antigudade minima tinan tolu nu’udar komisáriu-asistente, pois bele promove ba komisariu.

FM deskonfia iha politizasaun nomeasaun komisáriu no segundu komisáriu jerál PNTL nian, tanba iha dekretu lei númeru 35/2024 mós hateten kuandu komisáriu no segundu komisáriu jerál hala’o hela knaar tenke iha stock barak atu bele halo kompetisaun maibé pesoál ne’ebé assume komisáriu no komisáriu jerál ne’e ida de’it no komisáriu asistente ne’e laiha.

FM bolu atensaun ba polítika sira ne’ebé jere instituisaun PNTL atu labele troka postu sira ne’e tuir postu instituisaun sivíl nian tanba troka la tuir Leí bele estraga kadeia komandu iha instituisaun PNTL nian.

“Prosesu selesaun ministeriu interior tenke rona komadante jerál liuhusi enkontru konsellu superiór polisia nian, tanba tinan barak nia laran PNTL nia dezenvolvimentu sofre ba politizasaun tanba ne’e mak prosesu selesaun tenke tuir lei ka estatuta PNTL hodi dezenvole PNTL tuir rekezitu iha polisia ASEAN nian,” Nelson Belo hateten.

Jornalista: Juvinal Cabral dos Santos