BCTL Identifika Moeda Falsu Sentavu 200 Sirkula iha Rai-Laran

Hatutan.com, (04 Marsu  2026), Díli– Banku Sentrál Timor-Leste (BCTL siglá Portugés) hamutuk ho autoridade sira Timor-Leste nian; Polísia Nasionál Timor-Leste (PNTL) no Polísia Sientifiku Investigasaun Kriminál (PCIC), fó sai  katak daudaun ne’e BCTL identifiká tán ona moeda falsu sentavu 200 tinan 2017  sirkula  iha Timor-Leste.

Lee Mós: Atensaun, Moeda Falsu Sentavu 50 Sirkula Ona iha Timor

BCTL hamutuk ho PNTL no PCIC informa kona-bá moeda falsu sentavu 200 ne’ebé sirkula iha Timor-Leste. Foto/Zita Menezes

Jerente Operasaun Moeda BCTL, António Espirito Santo akompaña husi autoridade sira PNTL ho PCIC, Kuarta (04/03/2026), liu husi konferénsia imprensa, hkatuir primeira vez  BCTL deteta moeda falsu sentavu 200 iha semana kotuk, Sesta 27 Fevereiru 2026, liuhosi atividade bankaria BCTL nian hodi identifiká katak osan falsu sentavu 200 hamutuk ho osan di’ak nian.

BCTL afirma posivelmente moeda falsu sentavu  200 sirkula liu husi merkadu, loja, estasaun kombustivél, vendadór móvel ka ambulante sira, jogu sira no fatin sira ema sosa no fa’an sasan.

Ho situasaun ida ne’e, BCTL hato’o ba komunidade iha teritóriu nasionál hanesan tuir-mai :

1. Verifika ho atensaun osan 200c, série 2017, bainhira halo transaksaun ruma (sosa no faán sasan).
2. Se karik wainhira halo transaksaun ruma (sosa/faan) mak suspeita Moeda 200 Centavos Falsu, labele fó fila fali osan ne’e ba sirkulasaun. Rai hela moeda ne’e no komunika kedas ba Banco Central. Iha munisípiu sira no área rural, kazu hanesan bele mos relata ba PNTL, PSIC, Autoridade lokal iha nivel Aldeia ka Suku
3. Bainhira haree no deskonfia individu ruma lori osan 200 Centavos falsu ho montante boot favor hato’o kedas ba autoridade relevante hanesan PNTL, PSIC.
4. Autentisidade osan 200 Centavos lolos/original/jenuínu maka ho kualidade diak, mahar no figura ne’ebé mos, ho marka tinan 2017, marka BCTL ho letra kiik, dezeñu foho ho karau iha natar laran. Letra REPÚBLICA DEMOCRÁTICA DE TIMOR-LESTE ho asentu iha Ú ho Á. Hanesan figura tuir mai.
5. Ikus liu husu ba komunidade atu nafatin utiliza ita nia osan centavos husi 1c, 5c, 10c, 25c, 50c, 100c no 200c, no nafatin tau fiar ba autoridade kompetente sira nomós koopera hodi identifika no buka tuir kriminozu sira ne’ebé responsabiliza ba aktus pruduz no sirkula osan 200 centavos falsu iha ita nian rain.

BCTL  sei foti medida adekuada haktuir kompeténsia ne’ébe lei fó hodi asegura nafatin sirkulasaun moeda ofisial (Centavos no notas Amerikanu) iha Timor-Leste.

Hafoin moeda falsu  sentavu 200 ne’e identifika, BCTL informa ona ba banku komérsiu sira ne’ebé hala’o nia atividade bankaria iha rai-laran, atu tau atensaun  ba moeda falsu sentavu 200.

BCTL  sei halo servisu maka’as hodi rekolla evidensia forte relasiona ho moeda falsu  sentavu 200 no sei informa fali ba públiku.

BCTL husu atu komunidade sira ba futuru simu moeda sentavu 200 karik haree didi’ak lai mak simu no sirkula.

Superintendente Asisténsia Xefe Polísia, Mouzinho T. Correia, subliña hafoin simu tiha informasaun moeda falsu sentavu 200 husi BCTL, Polísia hala’o  kedas prosesu investigasaun iha momentu ne’ebá, no  seidauk identifiká autór kriminozu sira ne’ebé kria osan falsu no prosesu investigasaun sei la’o hela.

“Kona-bá autór ita sei buka tuir prosesu sei la’o hela depois ita nian ema iha tereñu mós hala’o hela servisu, nune’e husu ba públiku hetan osan sira ne’e duvida bele hato’o ba iha eskuadra PNTL no OPS hodi bele kontaktu ba diresaun Nasionál investigasaun hodi halo intervensaun,” Superintendente Asisténsia Xefe Polísia, Mouzinho T. Correia informa.

 Jornalista : Zita Menezes