Governu Sei Buka Rai Seluk Hodi Kontinua Harii Estádiu Futeból Indoor ho Padraun Internasionál

Hatutan.com, (05 Marsu  2026), Díli- Ministru Joventude, Desportu, Arte  no Kultura (MJDAK), Nelio Isaac Sarmento, hateten  Governu sei buka rai livre seluk hodi kontinua halo konstrusaun Estádiu Futeból  indoor ho padraun internasionál.

Lee Mós: Governu TL Atribui Direitu Konsensaun Rai ba FFTL Atu Padroniza Estádiu Futeból

Dezeñu futuru Estádiu Munisipál Díli. Foto/Dok.FFTL

Ministru MJDAK Nelio Isaac Sarmento hateten, kona-bá fasilidade desportu liuliu futeból nian parte Governu  la’o hela hodi identifika fatin balu, oinsá mak atu ajuda dezenvolve fasilidade sira ne’e.

Momentu ne’e MJDAK entrega ona estádiu munisipál ba Federasaun  Futeból Timor-Leste (FFTL) tanba dehan katak sira iha orsamentu naton atu hadi’a.

Nia dehan kona-bá estádiu  foun iha Tasi-Tolu sei iha diferensa hanoin balu husi grupu sosidade sivíl no mós parte igreja nian, maibé Governu maibé nafatin buka meius husi rai balu ne’ebé sei livre nune’e bele kontinua konstrui halo kampu futeból  indoor tuir padraun internasionál

“Rai barak loos, ami identifika, maibé haree loos ida ne’ebé mak di’ak para labele inkomoda ema seluk,” Ministru MJDAK  Nelio Isaac Sarmento hateten hodi hatan jornalista sira iha Parlamentu Nasionál, Kinta (05/03/2026).

Fó hanoin fali katak FFTL hamutuk ho FIFA identifika ona rai iha Tasi-Tolu atu halo kontrusaun ba estádiu futeból foun indoor ho padraun internasionál, maibé sei iha diferensa hanoin husi parte igreja no sosiéddade sivíl sira, nune’e  to’o ohin loron seidauk bele realiza obra ne’e.

Jornalista: Zita Menezes