PNTL Kontinua Investiga Moeda Falsu Sentavu 200 Ne’ebé Sirkula Ona

Hatutan.com, (05 Marsu 2026), Díli-Polísia Nasionál Timor-Leste (PNTL) kontinua halo investigasaun ba osan moeda falsu sentavu 200 ne’ebé sirkula ona iha teritóriu Timor-Leste.

Lee Mós: BCTL Identifika Moeda Falsu Sentavu 200 Sirkula iha Rai-Laran

Autoridade Polísia aprezenta moeda falsu no orijen. Foto/Zita Menezes

Portavós interinu Komandu Jerál Polísia Nasionál Timor-Leste (PNTL), Superintendente Asistente Polísia Mouzinho T. Correia,  Kinta (05/03/2026),  afirma Banku Sentrál  Timor-Leste (BNCTL-sigla portugés) fó ona informasaun ba públiku kona-bá moeda falsu sentavu 200.

“Prosesu investigasaun sei la’o hela, ita seidauk dehan produsaun osan ne’e iha rai-laran ka rai-li’ur, mais klaru katak ida ne’e la’ós ema bai-bain mak halo ne’ebé mai ho rekursu sufisiente ka natón,” Superintendente Asistente Polísia Mouzinho T. Correia informa liu husi konferénsia imprensa iha salaun Ministériu Interiór.

Nia informa, prosesu investigasaun ne’e iha faze lubuk ida, PNTL nu’udar órgaun polísia Kriminál  hahú husi prosesu inisiál ema bolu (prelimenary investigation) halo iha PNTL nian hahú husi rekolla informasaun, rekolla faktu ka evidénsia hafoin submete ba iha Ministériu Públiku (MP).

Ministériu Públiku mak na’in bá prosesu hotu-hotu depende ba ninia tempu hodi delega fila-fali mai PNTL ka órgaun polísia Kriminál seluk ka Polísia Sientífika Investigasaun Kriminál (PCIC) ka sira bele halo investigasaun rasik.

Nia dehan, relasiona ho osan falsu ne’e sensitivu la halimar nune’e autór na’in hira, sé-sé mak inklina labele relata tanba bainhira fó sai hotu bele fó perigu ba prosesu investigasaun.

Jornalista: Juvinal Cabral dos Santos