Prezidente Repúblika Husu Governu Tau Osan Hadia Tratór Unidade 16 iha Fatumaka

Hatutan.com, (05 Marsu 2026), Díli– Prezidente Repúblika, José Ramos Horta, husu Governu atu hadia tratór tuan unidade 16 iha Fatumaka  hodi suporta  atividade agrikultór sira.

PR Ramos-Horta ho PM Xanana hasoru malu ho Amu Elligio Locatelli, SDB iha Palásiu Prezidensiál, Kinta (05/03/2026). Foto/Marcelino Tomae

Prezidente Repúblika José Ramos‑Horta hateten katak nia halo enkontru semanál ho Primeiru-Ministru no mós enkontru informal ho Amu Elígio  Locatelli, SDB atu diskute problema importante sira, liu-liu kona-bá falta kbiit ka enérjia  no apoiu ba agrikultór sira iha área Baucau hanesan Baguia, Laga no Fatumaka.

Xefe Estadu ne’e hateten, tratór balun tuan loos, tanba balun uza dezde dekada 1960 no balun to’o tinan 40 resin ona. Maibé, agora Governu autoriza ona atu hadi’a, no material sira mós dadaun iha dalan atu rekupera tratór hirak ne’e.

Prezidente Repúblika, José Ramos-Horta hateten  iha tinan hirak nia laran, nia rasik mós utiliza orsamentu Prezidénsia nian entre US$50,000.00 to’o US$100,000.00 atu ajuda komunidade iha Fatumaka, liu-liu atu aluga tratór hodi dulas rai agrikultór sira nian.

Nia subliña, bainhira la iha apoiu ne’e, agrikultór sira tenke selu tratór to’o US$20.00 kada oras, tanba tratór presiza kombustível barak. Maibé, ho apoiu husi Prezidénsia, agrikultór sira selu de’it US$5.00 kada oras, ne’ebé halo sira kontente tanba bele fasilita servisu iha sira nia to’os.

Nia dehan, ema ida iha Malázia, ne’ebé koñese di’ak ho nia, oferese fertilizante hamutuk 60 toneladas. Fertilizante ne’e prodús iha Amérika no haruka husi Malázia ho forma doasaun gratuita, inklui transporte bá Timor-Leste.

Ramos-horta tenik luk nia planeia atu entrega fertilizante ne’e direta ba Fatumaka, maibé depois diskute ho Amu Elígio Locatelli, sira deside entrega bá Ministériu Agrikultura atu halo teste uluk atu haree karik fertilizante ne’e apropriadu ka lae ba kondisaun rai iha Timor-Leste.

Jornalista: Marcelino Tomae