PNTL Asegura Ona JRO Ne’ebé Abandona Bebe iha HNGV

Hatutan.com, (11 Marsu 2026), Díli-Polísia Nasionál Timor-Leste (PNTL) asegura ona JRO nu’udár inan  ba bebe ne’ebé  abandona  semana tolu iha Óspital Nasionál Guido Valadares (HNGV).

Lee mós: PNTL Identifika Ona Suspeita Ne’ebé Abandona Bebe iha HNGV

PNTL asegura JRO (tau hela jaket no taka ulun) nu’udár inan ne’ebé abandona nia bebe semana tolu ona iha HNGV. Foto/Juvinal Cabral dos Santos

Komandante Polísia Eskuadra Kristu-Rei, Munisípiu Díli, Inspetor Xefe Polísia Paulino de Carvalho, Kuarta (11/03/2026), informa iha Tersa horseik, Polísia buka tuir bebe nia inan nia paradeiru no hale’u tuku 06:00 dadeer, bebe nia inan ho naran inisiál JRO entrega nia an volontáriu ba Polísia. Nune’e, Polísia lori kedas JRO ba HNGV hodi haree nia bebe no kontinua lori ba iha Vulnerable Person Unit (VPU) Munisípiu Díli hodi loke prosesu.

“JRO voluntáriamente entrega an tanba nia mós akompaña notísia, entaun dadeersan, ita hetan nia paradeiru nia mai iha ospitál haleu tuku 06:00 Otl,” Inspetór Xefe Polísia Paulino de Carvalho informa ba jornalista sira.

Nia hatutan, relasiona kazu ne’e prosesu kontinuasaun kona-ba aktu krime no detensaun ka lae, ne’e parte VPU mak sei relata.

Inspetor Xefe Polísia Paulino de Carvalho hateten katak, prosesu ba bebe nia aman ne’e nia parte  seidauk bele halo komentáriu.

Jornalista: Juvinal Cabral dos Santos