Kadete PNTL Sei Organiza Manifestasaun iha Ministériu Interiór

Hatutan.com, (13 Marsu 2026), Díli-Reprezenta kadete  Polísia Nasionál Timor-Leste (PNTL) sei halo manifestasaun iha Ministériu Interiór tanba dúvida seriedade  Komisaun Fiskalizasaun, Supervizaun no Revizaun ba prosesu rekrutamentu PNTL 2025.

Lee Mós: Komisaun Revizaun Rekrutamentu PNTL Identifika Polísia Nia Oan 71 ho Jerasaun Patriota Na’in-72 Tama iha Lista Rekrutamentu

Konferénsia imprensa reprezentante kadete PNTL iha Asosiasaun HAK, Díli, Sesta (13/03/2026). Foto/Juvinal Cabral dos Santos

Liu husi konferénsia imprensa iha Asosiasaun HAK, Díli, Sesta (13/03/2026), porta-voz kadete PNTL, Tito Orleans Missa, informa, sira-nia parte dúvida ho seriedade Komisaun Fiskalizasaun, Supervizaun no Revizaun  ne’ebé lidera husi Paulo Assis Belo, atu foti medida ba membru PNTL nian oan na’in-71 no jerasuan patriota na’in-72 ne’ebé tama iha lista 400 ba faze teste médiku.

“Iha inisiu, ami nia desizaun mak tenke anula totál tanba efetivu no justu liu, tanba ita haree katak se karik la anula totál  ka mantein,  PNTL nia oan mak okupa nafatin no hamosu deskriminasaun,” Tito Orleans Missa  afirma.

Reprezenta kadete PNTL ne’e rekomenda uza sistema eleminatóriu, tanba buat ne’ebé komisaun suprevizaun fiskalizasaun halo ona revizaun semana ida identifika PNTL nia oan na’in-71 no jerasaun patriota na’in-72, signifika sira investiga ba de’it PNTL nia oan, maibé subriñu, família, no rekomendasaun sira husi parte polítika sira la investiga.

Pozisaun kadetes PNTL sira eziji  halakon injustisa iha prosesu rekrutamentu no labele fahe klase, nune’e di’ak liu mak anula totál no halo prosesu rekturamentu foun.  

Sira husu ba Primeiru-Ministru (PM), Kay Rala Xanana Gusmáo bele rezolve tuir nesesidade ne’ebé Timor oan sira presiza iha prosesu ne’ebé transparante no laiha diskriminasaun.

” PNTL sai ezemplu di’ak ona ba instituisaun sira seluk bele prátika tuir, entaun ita hakarak ne’e buat hotu ne’e justu to’o obriga sira atu komprimenta ba lei ne’ebé vigór para labele inkomprimentu fali. Tanba ne’e mak kualker PNTL no veteranu nia oan nia direitu atu tuir vaga hanesan ho ami, maibé importante tenke prense rekizitu,” Tito Orleans Missa   afirma.

Nia esplika, hanesan iha Ainaro kadete balun altura la to’o, idade liu tiha tanba de’it nia aman deviza boot iha PNTL entaun fasilita formuláriu de’it.

“Hanesan jerasaun foun hakarak ko’alia buat loos no justu, sé karik iha loron 20 nia laran mak la tuir ami nia ezizensia, ami sei halo asaun, no karta ami submete ona ba PNTL, katak  Segunda (16/03/2026), ami halo asaun iha kampus Universidade Nasionál Timor Lorosae (UNTL), Fakuldade Ciencia Sosial (FCS) iha edifisiu Ministru Interiór (MI) nia oin, hahu tuku 08:00 dader Otl to’o 18:00 lorokraik,”  porta-vóz kadete PNTL sira-nian ne’e informa.

Kadete PNTL sira nia alvu protesta ne’e ba Ministériu Interiór no Konsellu Ministru, husi kandidatu na’in-400 ne’ebé mak atu tuir teste médiku mak suspende.

Jornalista: Juvinal Cabral dos Santos