BCTL Apela Ba Públiku Utiliza Moeda Sentavu 200 Tanba Lejitimu no Ofisiál

Hatutan.com, (13 Marsu  2026), Díli– Banku Sentrál Timor-Leste (BCTL, siglá Portugés) apela ba públiku, liu-liu negosante sira, loja no estasaun kombustível sira, kontinua simu moeda sentavu 200 tanba osan ne’e legal.

Lee Mós: BCTL Identifika Moeda Falsu Sentavu 200 Sirkula iha Rai-Laran

Komunidade, liuliu negosiante sira paniku ba forma iha BCTL atu troka sira-nia moeda sentavu 200 tanba loja balun la simu moeda ne’e. Foto/Zita Menezes

Liuhosi konferénsia imprensa konjuntu BCTL ho  Ministériu Komérsiu Industria (MCI siglá portugés), iha sala konférensia BCTL, Sesta (13/03/2026), Vise-Governadora BCTL, Sara Lobo Brites hateten  daudaun ne’e  públiku paniku moeda  sentavu 200 no loja balun rejeita simu moeda sentavu 200, nune’e BCTL findamenta katak moeda sentavu 200 ne’e legal no fisiál.

“Moeda sentavu 200 ne’e, ita nia osan,  laiha razaun atu rejeita. Osan ne’e orijinál sirkula iha ita nian teritóriu tomak,” Vise-Governadora BCTL, Sara Lobo Brites fundamenta.

Liu husi  públikasaun BCTL iha loron  04 fulan-Marsu 2026, kona-bá sirkulasaun moeda  sentavu 200 falsu ho intensaun atu informa ba negosiante no sidadaun sira atu vijilánte, tanba iha duni informasaun no BCTL deteta duni moeda  sentavu 200 serie 2017  falsu, tanba ne’e mak BCTL nian obrigasaun informa ba públiku.

“Maibé la’ós atu informa para hetan fali reasaun hodi la simu fali osan moeda sentavu 200 ne’ebé mak orijinal, tanba bainhira loja, negosiante ki’ik  no boot husi liur husi laran kuandu sidadaun sira ba kompra sasan loja sira bolta moeda sentavu  200  ne’e sidadaun sira simu, maibé bainhira sidadaun sira fila-fali ba hola sasan loja sira, deside la simu fali,” Sara Lobo Brites hateten.

Nia hateten kona-bá loja sira ne’ebé mak rejeita moeda sentavu  200 ne’e  komportamentu ne’ebé laloos, seidauk iha informasaun ida katak moeda sentavu 200 ne’e la vale tanba moeda sentavu 200 vale legál no tenke sirkula nafatin iha teritóriu Timor-Leste. 

Vise-Governadora BCTL ne’e hatutan kona-bá loja sira ne’ebé mak la simu moeda sentavu 200, hahú Segunda, 16 fulan-Marsu 2026, BCTL sei halo servisu hamutuk ho Ministériu Komérsiu no Industria (MCI) hodi buka solusaun no hlao aproximasaun atu nune’e loja  no sidadaun sira bele iha konfiansa atu kontinua uza moeda sentavu 200.

BCTL ho MCI afirma katak moeda sentavu 200 lejitimu no ofisiál hodi utiliza. Foto/Zita Menezes

Iha fatin hanesan Direrór Jerál Komérsiu no Industria, Elias de Jesus Fatima aprofunda tan katak MCI daudaun ne’e iha koordenasaun ho BCTL bazeia ba informasaun no situsaun ne’ebé mak la’o daudaun iha rai laran, MCI  sei halo koordenasaun ho BCTL no autoridade relevante hodi halo monitorizasaun no sosializasaun ba utilizasaun moeda sentavu 200.

“Ha’u hanoin MCI nian papél klaru oinsá atu proteje ita nian konsumidór sira no ita nian komunidade negosíu.  Ho ida-ne’e, ami sei halo koordenasaun nafatin ho BCTL atu bele fó sosializasaun ba ita-nia komunidade,  negósiante  sira atu bele utiliza nafatin moeda  sentavu 200,” Diretór Jerál MCI, Elias de Jesus Fatima hateten.

Tuir observasaun Hatutan.com iha arredó BCTL iha oras dadersan  hatudu katak sidadaun barak, liuliu negosiante sira barak mak forma iha edifisiu BCTL hodi troká moeda sentavu 200 ne’ebé durante ne’e sira rai iha uma, tanba  sidadaun sira panikú relasiona ho moeda sentavu 200 ne’ebé dehan falsu no la vale.

Jornalista :  Zita Menezes