Veronica do Santos Mate ho Trajiku iha Katuas-Oan Nia Liman

Hatutan.com, (21 Marsu 2026), Díli-Komunidade ne’ebé hela besik iha área Paria dos Cocueiros, Díli, Sábadu dadeer (21/03/2026), hale’u tuku 03:50 Otl, hakfodak hetan mate isin inan-feto ho identidade Veronica dos Santos, ne’ebé  nakonu ho ran no isin lolon mesak kanek.

Veronica dos Santos mate iha katuas-oan nia liman iha iha área Paria dos Cocueiros, Díli, Sábadu dadeer (21/03/2026), hale’u tuku 03:50 Otl. Foto/Foti husi Mídia Sosiál

Informasaun preliminiara husi parte Polísia katak  matebian Veronica dos Santos, ho naran istrimadu Veve deskonfia hetan oho husi nia katuas-oan rasik ho naran inisiál CdA.

Matebian Vava nia mate to’o agora seidauk bele hatene loloos nia motive, tanba iha hela investigasaun.

Suspeitu ho inisiál CdA nu’udár matebian nia katuas-oan, daudaun ne’e, iha ona sela detensaun Polísia nian hodi submeter ba inverstigasaun no prosesu tuir lei ne’ebé vigora.

Matebian Vava hela  iha Aldeia Anin-Fuik, Suku Madohi, Postu Administrativu Dom Aleixo, Munisípiu Díli, moris iha loron 09 fulan-Setembru tinan 2005.   

“Iha kazu ida-ne’e patrollamentu to’o kedas iha fatin asegura lokál krime no ita kontaktu ba iha Forensik  foti mate-isin lori ba iha mortuariu Ospitál Nasionál Guido Valadares (HNGV) no suspeitu ita kaptura kedas lori ba detein kedas ita nia  Komandu Munisípiu Díli hodi submete ba iha prosesu investigasaun no kontinua ba  Ministériu Públiku (MP),”Komandante Polísia Munisípiu Díli, Komisariu Asistente Polísia Orlando Gomes, hateten ba jornalista sira iha Sentru Formasaun Polísia (CFP-sigla Portuges), Comoro.

“Iha prosesu investigasaun mak ita bele hatene motivu husi kazu ne’e rasik, matebian agora iha hela mortuariu HNGV ne’e ita nia Forensik rasik mak akompaña,” Komisáriu Polísia ne’ebé foin hetan promosaun ne’e afirma.

Suspeitu CdA nu’udár matebian Vava nia katuas-oan moris iha loron 20 fulan-Jullu tinan 2004, daudaun ne’e, kumpre hela detensuan iha Sela Polísia Munisípiu Díli, hodi submeter ba investigasaun no bainhira kumpre tiha oras 72 sei aprezenta ba Tribunál Judisiál Primeira Instánsia Díli (TJPID).

Jornalista: Juvinal Cabral dos Santos