Arguidu CdA Ne’ebé Deskonfia Oho Nia Ferik-Oan Veronica dos Santos Submete Ba Primeiru Interogatóriu

Hatutan.com, (23 Marsu 2026), Díli– Arguidu ho inisiál CdA ne’ebé deskonfia oho nia ferik-oan Veronica dos Santos iha área Praia dos Coqueiros, Segunda ne’e, submete ona ba interogatóriu judisiál dahuluk iha Tribunál Judisiál Primeira Instansia Díli (TJPID).

Lee Mós: Veronica do Santos Mate ho Trajiku iha Katuas-Oan Nia Liman

Arguidu CdA partisipa primeira interogatóriu iha TJPID, Segunda (23/03/2026). Foto/Juvinal Cabral dos Santos

Iha interogatóriu dahuluk ne’ebé prezide husi Juis estajiariu Cipriano Sarmento,  halo uluk identifikasaun ba Arguidu CdA nia identidade no Ministériu Públiku ne’ebé reprezenta husi Prokuradora Benvida do Rosario iha nia promosaun hodi promove krime tolu ba Arguidu CdA.

Krime ne’ebé Ministériu Públiku promove ba Arguidu  CdA mak Krime omesidiu agravadu ne’ebé previstu no punidinu iha artigu 139° husi Kódigu Penál, Krime arma branka husi rejime juridiku prátika arte-marsiál no arma branka husi lei númeru 5/2017 no krime violénsia domestika husi lei númeru 7/2010.

Ministériu Públiku iha nia alegasaun iha interogatoriu judisiál ne’e solisita ba Tribunál atu aplika Medida Koasaun Prizaun Preventiva, tanba arguidu nia aktu ne’e prienxe ba elementu krime husi krime ne’ebé promove ba arguidu.

Defeza husi Arguidu CdA, Defensór Públiku Sergio Dias Quintas aseita ho Ministériu Públiku nia alegasaun ne’e tanba nia asistidu nia hahalok ne’e prienxe husi elementu krime omesidiu agravadu.

Defensor Públiku, Sergio Dias Quintas hatutan, nu’udar Defensor Públiku ne’ebé fó asistensia tékniku gratuita bá arguidu CdA aseita promosaun Ministériu Públiku (MP)  hodi aplika  prizaun preventiva.

“Depois prosesu investigasaun sei la’o hela aban dader tuku 10:00 Otl mak foin bele rona despaixu juis nian, ita hatene katak prosesu investigasaun sei la’o hela, entaun hanesan Defensór Públiku mós asegura buat ida segredu justisa,” nia afirma.

“Ne’ebé ohin ha’u dehan katak tanba segredu justisa ha’u labele ko’alia buat ruma, soké ohin Ministériu Públiku husu promosaun atu aplika prizaun preventiva, tanba ha’u haree nia krime ne’e gravidade tanba omesidiu bazeia ba artigu 183° husi Kódigu prosesu penál  entaun ha’u mós aseita promosaun Ministériu Públiku nian,” nia subliña.

Sergio aprofunda sé karik juis konkorda promosaun  MP hodi aplika prizaun preventiva dalaruma ida-ne’e mak di’ak liu asegura arguidu iha prizaun preventiva, depois to’o tempu ida mak haree investigasaun ne’e oinsá.

Hafoin Tribunál rona tiha parte hotu, Tribunál liuhusi Juis  estajiariu Cipriano Sarmento deside hodi adia despaixu ba interogatóriu judisiál dahuluk ba Arguidu CdA ba fali  Tersa-feira, 24 Marsu ne’e, hale’u tuku 10:00 Otl.

Matebian Veronica dos Santos, deskonfia oho husi nia katuas-oan ho inisiál CdA iha área Paria dos Coqueiros, Díli, Sábadu dadeer (21/03/2026), hale’u tuku 03:50 Otl.

Matebian Veronica dos Santos ho naran estimada Vava hela  iha Aldeia Anin-Fuik, Suku Madohi, Postu Administrativu Dom Aleixo, Munisípiu Díli, moris iha loron 09 fulan-Setembru tinan 2005.   

Joranlista: Juvinal Cabral dos Santos