PDHJ Sei Investiga Desizaun “Diskriminativu” Hasoru Superintendente Polísia Julia Gama

Hatutan.com, (23 Marsu 2026), Díli-Provedoria Direitus Humanus no Justisa (PDHJ) sei halo investigasaun ba desizaun “diskriminativu” iha prosesu promosaun diviza hasoru Superintendente Polísia Julia da Gama.

Lee Mós: Superintendente Julia Gama Hetan Deskriminasaun iha Promosaun Diviza, Ofisiál Superiór PNTL Balun Kazu iha Tribunál Mós Promovidu

PDHJ sei halo investigasaun ba desizaun “diskriminativu” iha prosesu promosaun diviza hasoru Superintendente Polísia Julia da Gama. Foto/Juvinal Cabral dos Santos

“Hanesan provedor sei orienta diresaun fiskalizasaun atu buka tuir ida ne’e kazu diskriminasaun ne’ebé ita boot foti, ida fali mós  tanba promosaun ne’e halo iha Sábadu, ita feriadu hotu ita labele ba halo akompañamentu ne’ebé di’ak, maibé ami buka atu haree,” Provedór Direitus Humanus no Justisa (PDHJ),  Virgílio da Silva Guterres “Lamukan” informa ba jornalista sira konferénsia imprensa, Segunda (23/03/2026).

Relasiona ho ofisiál PNTL Julia da Gama nian PDHJ sei tau matan atu haree katak tanba saida mak desizaun atu elemina ne’e iha minutu ikus.

“Sé nia iha infrasaun ruma ne’ebé nia halo loloos iha avaliasaun inisiál ne’e atu lista ne’e tenke iha ona, labele to’o ona ema atu tama iha formatura atu ba promove depois ita hasai, ne’e hamosu deskonfiansa katak desizaun balun bele la bazeia bá avaliasaun ka análiza ne’ebé kle’an atu determina sé mak atu hetan promosaun,” Provedór Virgílio “Lamukan” informa.

PDHJ sei haree prosesu promosaun ne’e sé bazeia kompetensia Komandu nian, no kompetensia governu nian, liuliu Ministériu Interiór (MI) atu halo, maibé buat ne’ebé PDHJ tama iha laran ne’e katak kualker desizaun ne’ebé atu promove  ofisiál públiku sira  tenke respeita prinsipiu boa governasaun.

“Ita halo Dekretu ka  ho diploma ruma sai tenke bazeia ba Leí no bazeia bá análize ne’ebé kle’an katak, ema ne’ebé ita atu promove ne’e merese duni la’ós tanba nia mane ka nia feto ka la’ós tanba nia besik ita ka entaun buat ne’e mak ha’u hanoin atu subliña,” Virgílio Guterres hateten.

Nia hatutan, Primeiru-Ministru Kay Rala Xanana Gusmão iha munisípiu sira sempre hateten evita buat ida familiarismu, nepotismu, espíritu ne’e iha ne’e. Katak ita labele haree ema ne’e tanba nia ita nia família, maibé nia merese duni katak nia liu prosesu sira ne’ebé entidade tau nia respeita Kódigu de konduta prosesamentu promosaun ne’e iha, no nia iha ne’ebá duni.

PDHJ lamenta, agora ema ne’e naran tama tiha lista, tama tiha formatura mak hasai ne’e hamosu kestaun.

“Ami sei tau prioridade halo fiskalizasaun ba ida ne’e, seidauk to’o iha konkluzaun tanba ami presiza atu halo fiskalizasaun. Maibé pelumenus sentimentu injustisa ne’e mosu ona ba ema ne’ebé sai vítima bá prosesu ne’e tanba ultimu minutu nia parsialmente nia família hatene ona, nia oan sira hatene ona, ninia família barak mós hatene ona katak nia atu promove no dalaruma sira mós prepara tan atu ba partisipa serimónia promosaun,” PDHJ preokupa.

Depois iha serimónia promosaun nia la mosu iha ne’ebá sentimentu injustisa ne’e ema ne’e sofre tiha ona.

Jornalista: Juvinal Cabral dos Santos