Matebian Veronica dos Santos Nia Katuas-Oan Kumpre Prizaun Preventiva

 Hatutan.com, (24 Marsu 2026), Díli–  Tribunál Judisiál Primeira Instánsia Díli (TJPID) liu husi desizaun Juíz Turnu, Cipriano Sarmento, aplika medida Prizaun Preventiva (PP) ba arguidu CdA ne’ebé deskonfia oho nia ferik-oan Veronica dos Santos, iha área Praia dos Coqueiros, foin lalais ne’e.

Lee Mós: Arguidu CdA Ne’ebé Deskonfia Oho Nia Ferik-Oan Veronica dos Santos Submete Ba Primeiru Interogatóriu

Arguidu CdA ne’ebé deskonfia oho nia fetik-oan Veronica dos Santos partisipa primeira interogatóriu iha Tribunál Judisial Primeira Instánsia Díli (TJPID). Foto/Juvinal Cabral dos Santos

Iha audénsia julgamentu ba kazu omisídiu ne’e, Ministériu Públiku  ne’ebé reprezenta husi Prokuradora Bemvinda do Rosário promove arguidu ho krime  tolu, mak hanesan krime omesidu simples, arma branka no violénsia doméstika ho forma ofensa integridade fizika simples.

Iha alegasaun Ministériu Públiku husu Tribunál atu aplika medida prizaun preventiva (PP) ba arguidu, tanba konsidera iha indisu forte ba krime ne’ebé promove mai iha Tribunál.

Defeza ne’ebé  fasilita asisténsia ba arguidu CdA, Sérgio Dias Quintas husi Defensór Públiku, aseita ho pedidu Ministériu Públiku nian aplika medida Prizaun Preventiva ba iha arguidu, atu asegura arguidu labele komete tan problema foun.

Iha Sábadu liubá, (21/03/2026,)  tuku 04:50 dadeer Otl, iha tasi ibun área Praia dos Coqueiros, Díli, akontese insidente trájiku ne’ebé rezulta Veronica dos Santos lakon vida no latan iha Estrada ibun ho ran.

Mate isin Veronica dos Santos parte Hospitál no Polísia entrega fila ona ba família hodi halo prosesu fúnebre tuir kultura hafoin parte Polísia Forensik halo autobsia.

Jornalista: Juvinal Cabral dos Santos