Iha Hela Faze Diskusaun ho Google AdSense ho YouTube Mai Timor-Leste

Hatutan.com, (26 Marsu 2026), Díli-Ministru Transporte no Komunikasaun (MTK) Miguel Marques Gonçalves “Manetelu” infroma atu lori Google AdSense ho YouTube mai loke reprezentasaun iha Timor-Leste iha hela  faze diskusaun.

Lee Mós: Konten Kreatór Ary Bargon Dúvida ho SEKOMS-MTK Lori Google AdSense ho YouTube Mai Timor-Leste

Ministru Transporte no Komunikasaun (MTK), Miguel Marques Gonçalves Manetelu. Foto/Dok.

“Diskusaun halo hela, horibainhira, ami  bá partisipa iha ita nia prosesu adezaun ba ASEAN ne’e, iha reuniaun ida ha’u halo ho Meta Google iha konkordansia mais to’o mai Timor-Leste halo kontaktu sira. Tanba ne’e, ha’u orienta ona, asesor ho tékniku sira MTK nian mantein kontaktu para oinsá mak  implementa,” Ministru Transporte no Komunikasaun (MTK) Miguel Marques Gonçalves “Manetelu” ba jornalista sira iha Palásiu Governu, Kuarta (25/03/2026).

Ministru Miguel “Manetelu” haktuir, la’ós komprimisiu maibé sira nia aseitasaun iha Malázia ne’e oinsá mak ita bele implementa.

Rekorda fali katak, iha loron, 13 fulan-Marsu 2025, reprezentante konten kreatór sira hasoru malu ho Sekretáriu Estadu Komunikasaun Sosial (SEKOMS) Expedito Loro Dias Ximenes iha Palásiu Governu,  hodi propoin ba  Governu Timor-Leste konvida plataforma boot sira hanesan Meta Facebook, YouTube, no TikTok, Google AdSense atu loke reprezantasaun iha Timor-Leste. 

Ho baze ba ideia konten kreatór Timoroan sira-nian ne’e,  SEKOMS Expedito Loro Dias Ximenes ho nia ekipa téniku halo vijita ida ba Jakarta  no fila mai halo enkontru oioin ho konten kreatór Timoroan sira, kontinua promote ba konten kreatór Timoaon sira atu lori duni Google ho YouTube mai Timor-Leste.   

Jornalista: Juvinal Cabral dos Santos