Aero Díli Hahú Voo Inaugural Ba Kuala Lumpur ho Pasajeiru Na’in-93

Hatutan.com, (28 Marsu 2026), Díli-Empreza Airline Timroan nian, Aero Díli, Sábadu (28/03/2026), hahú voo inaugural  ba Kuala Lumpur, Malázia.

Lee Mós: Sábadu Ne’e, Aero Dili Hahú Voo Dahuluk Ba Kuala Lumpur

CEO Aero Dili, Lourenço de Oliveira entrega prenda ba Prezidente Repúblika, José Ramos-Horta iha ámbitu serimonia voo inaugural Aero Dili ba Kuala Lumpur iha Aeroportu Internasionál Prezidente Nicolau Lobato, Sábadu, 28 Marsu 2026. Foto/Média GPR

Voo inaugural ne’e lansa diretamente husi  Prezidente Repúblika (PR), José Ramos Horta akompaña husi Vise-Primeiru Ministru asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino, Ministru Transporte no Komunikasaun (MTK), Miguel Marques Gonçalves Manetelu, Embaixadór Malázia mai Timor-Leste, Amarjit Singh Sarjit Singh, CEO Aero Díli, Lourenço de Oliveira, Ministru Negosiu Estranjeiru no Kooperasaun, Bentido Freitas no konvidade onran seluk tan.

Tuir oráriu voo Aero Díli nian ba Kuala Lumpur, semana ida dala-rua, iha Tersa ho Sábadu. Voo Aero Díli dahuluk husi Aeroportu Internasionál Prezidente Nicolau Lobato Comoro, Dili ba Kuala Lumpur hale’u tuku 08:00 dadeer Otl ho pasajeiru na’in-93.

Operasaun internasionál Aero Dili nian hahú ho vizaun atu sai kompañia nasionál dahuluk ne’ebé uza aviaun jet ho bandeira Timor-Leste nian.

Primeiru pasu boot mak simu aviaun Airbus A320 iha fulan-Marsu 2023, ne’ebé loke dalan ba konetividade Timor-Leste ho rai-li’ur,  hahú voo komersiál dahuluk ba Indonézia (Dili-Denpasar/Bali) akontese iha loron 12 Maiu 2023.

Iha loron 24 Fevereiru 2024, Prezidente Repúblika, José Ramos-Horta lansa voo direta dahuluk ba Singapura (Changi Airport) ho inisialmente hahú ho voo dala ida kada semana, no aumenta ba dala rua kada semana hahú iha Abril 2024.

Iha loron 14 Fevereiru 2025, Aero Dili lansa rota foun ba Xiamen-Xina no  kontinua ho planu  alarga tan ba sidade sira seluk hanesan Fuzhou no Hangzhou.

Alvu tuir mai, Aero Dili atu loke tan rota ba Darwin-Austrália ne’ebéfiksa ona marka voo inaugural ba loron 24 Maiu 2026, ho voo dala rua kada semana no iha mós planu ba Melbourne iha futuru.

Aero Dili iha mós planu luan atu liga Dili ho Manila-Filipina atu hametin relasaun entre nasaun rua ne’e. 

Diretór Ezekutivu Aero Díli, Lourenco de Oliveira, informa, rota foun ba Kuala-Lumpur-Malázia aumenta opsaun ida tanba konentividade voo rejional no internasionál tanba Kuala-Lumpur hanesan fatin ne’ebé konbitinente ba tránzitu ho opsaun voo barak.

Protokolu Kuala Lumpur mós loke hodi prepara ba enkontru ASEAN iha 2029 iha Timor-Leste, Aero Díli nakloke atu servisu hamutuk ho kompañia Airline nasionál Malázia nian   inklui ho Batik Air Malázia nian hodi hafasil pasajeiru atu hili konesaun voo.

Aero Díli mós halo kooperasaun ho Mahakota Medikal Center iha Malaka-Malázia hodi  fasilita maluk sira ne’ebé presiza atu halo tratamentu saúde.

“Vantajen ne’ebé mak ami iha ami bele simu pasiente ne’ebé uja stretcher hamutuk ho Mahakota Medikal Center, ami sei fornese servisu ne’ebé adekuadu no tuir padraun,” Lourenco de Oliveira hateten iha serimonia voo inaugural ba Kuala Lumpur ne’ebé hala’o iha Sala VIP Aeroportu Internasionál Prezidente Nicolau Lobato, Comoro.

CEO Aero Díli hatutan, ho rota foun ida-ne’e sira hein katak bele atrai liután ema barak atu mai vizita Timor-Leste, tantu mai halo negósiu ka mai hanesan turista, no hodi kontinua apoiu ajenda ASEAN nian.

Iha fatin hanesan Prezidente Repúblika José Ramos Horta liuhusi diskursu, kontenti haree ema barak partisipa iha serimónia voo dahuluk Aero Díli ba Kuala Lumpur, Malázia.

“Ha’u nunka falta ba Lourenço de Oliveira nia inisiativa ruma, tanba ha’u sempre apoia maka’ás Timoroan sira ne’ebé inisiativa iha setór ne’ebé de’it sempre apoiu, no ita hotu-hotu hatene ne’ebé iha negósiu airline  komplexu no kumplikadu, kustu operasaun ne’e todan tebe-tebes, sé ita iha motor oan ida ita sosa iha Audian tenke halo manutensaun kuantu mais aviaun,” Ramos-Horta hateten.

“Ha’u la temi rai maibé mundu ne’e nune’e, osan atu  mai husi bilete pasajeirus sira mai liuhusi karga aéreu, se la iha karga aéreu entaun sé mak selu aviaun ne’e, entaun tenke tau bá pasajeirus mak selu. Konentividade ba ita importante tebe-tebes,” Ramos-Horta afirma.

Ministru Transporte no Komunikasaun (MTK) Miguel Marques Gonçalves Manetelu, apresia ba empreza privadu Aero Díli, Lourenço de Oliveira ne’ebé halo luan tan konetividade Timor-Leste ba rejional no internasionál.

“Iha  Fevereiru 2025 iha fatin ida ne’e, ha’u mai hato’o intervensaun bainhira Aero Díli halo lansamentu voo dahuluk husi Dili ba ASEAN nian, tinan ida liu tiha ohin Sabadu (28/03/2026) fatin ida ne’e asiste tan dala ida lansamentu ba Aero Díli nian voo dahuluk bá Kuala Lumpur, Malázia,” Ministru Miguel Manetelu hatutan.

Nia esplika, hanesan iha intervensaun ne’ebé hato’o ona husi maun Lourenço de Oliveira ne’e importante la’ós ba Aero Dili maibé mós ba Timor-Leste.

Governante hateten, IX Governu konstitusionál fó importánsia ba setór Transporte nu’udar pilar importante ida iha dezenvolvimentu ekonómiku nasaun nian. Governu nia papel mak atu kria kondisaun ba kresimentu ekonómiku hadi’a no aumenta sirkulasaun ba ema no sasán tuir vizaun ne’ebé hatur ona iha planu estratéjiku.

“Transporte aéreu sai nu’udar servisu xavi ida ba movimentu ema no sasán mai ita nia rai no husi ita nia rai sai ba li’ur, no sei tulun atu dudu dezenvolvimentu industria turistika komérsiu no negósiu seluk,” Ministru Transporte no Komunikasaun Miguel Manetelu afirma.

Nia dehan, atu hetan konfiansa ba ligasaun entre Timor-Leste no destinu rejionais no internasionais, governu sei esforsu atu kria kondisoens aumenta voo regular sira ho opsaun barak liután.

Mezmu komprinde katak inisiativa iha ohin, inisiativa setór privadu rasik atu halo luan nia konentividade, maibé governu haree katak ida-ne’e halo parte ba esforsu koletivu ida entre setór privadu no públiku liu-liu nu’udar Ministériu ne’ebé tutela ba asuntu transporte nian sempre apoiu inisiativa hotu-hotu liuhusi servisu Autoridade  Aviasaun Civil Timor-Leste (AACTL) no Administrasaun Aeroportu no Navegasaun Timor-Leste (ANATL) hodi fasilita iha prosesu tomak ba vó dahuluk nia.

Governante ne’e esplika, nu’udar kompromisiu ida ho  governu mós atu mellora fasilidade Aeroportu na’in, hasa’e koñesimentu ita nia autoridade no administrasaun Aeroportu nian. Inklui hadia regulamentu nesesariu hodi garante kumprimentu ita nia rai nia ba komprimisiu no padraun internasionál iha setór aviasaun nian.

“Ha’u hein katak ho vó direta husi Díli ba Kuala-Lumpur sei fó liután konfiansa bá paises sira seluk, liu-liu paises membru ASEAN nian hodi bele loke odamatan ba Timor-Leste hodi bele iha kontentividade direita ba sira nia rai no mós husi sira-nia rai mai Timor-Leste”, Ministru Transporte no Komunikasaun Miguel Manetelu afirma.

Iha fatin hanesan embaixador Malázia mai Timor-Leste, Amarjit Singh, apresia ho dezenvolvimentu Aero Díli di’ak tebes ne’ebé hetan apoiu maka’as husi governu no estadu, nia kontenti Aero Díli bele halo voo ba Kuala Lumpur, Malázia.

Jornalista: Juvinal Cabral dos Santos