Defeza & Seguransa
Ministru Interiór Francisco Guterres Mak Hatun Despaixu Demoradu Promosaun Diviza Ba Julia da Gama
Hatutan.com, (01 Abríl 2026), Díli-Ministru Interiór (MI) Francisco da Costa Guterres, rekoñese nia mak hatun despaixu demoradu promosaun diviza ba membru Polísia Nasionál Timor-Leste (PNTL) Superintendente Polísia Julia da Gama.
Ministru Interiól, Francisco da Costa Guterres halo klarifikasaun ba públiku kona-bá kestaun Superintendente Polísia Julia Gama nian. Foto/Juvinal Cabral dos Santos
“Despaixu ne’e ha’u nian duni, Komandante Jerál sesante Komisáriu Henrique da Costa nunka hasai despaixu kona-bá promosaun, nia so haruka karta bá ha’u kona-bá membru, hatama lista bá ha’u tanba membru sira ne’ebé atu ba promove, ha’u husu ba nia hanesan ne’e ofisiál sira ne’ebé mak prenixe rekezitu ne’e mak hatama mai ha’u, ne’e PNTL mak haruka karta mai ha’u,” Ministru Interiór (MI) Francisco da Costa Guterres iha Palásiu Governu, Kuarta (01/04/2026).
Nia dehan, kona-bá despaixu ne’e nia rekoñese despaixu husi Ministru Interior ne’e hakarak ka lakohi ne’e despaixu ministerial ida, ne’ebé mak sai iha ne’ebá mak Komandu Jerál haruka karta mai submete naran sira mai atu ba promove.
“Ne’ebé ha’u hanoin kestaun ida-ne’e Superintendente Julia da Gama mós hatene kompriende, ne’ebé ha’u horibainhira ko’alia ho nia dala hira katak nia la lakon direitu,” Ministru Francisco Guterres afirma.
Nia realsa, prosesu tenke la’o tuir nia regras hanesan membru polísia ida nia tenke submete ba regras ne’ebé mak iha.
“Ita kuandu haree buat hotu loos ona prontu ninia direitu nunka lakon nia kontinua re-toma fali. Ha’u hanoin kestaun ida-ne’e la’ós problema boot ida, ne’ebé ida ne’e kestaun polítika individual sira, Instituisionalmente ita la presiza tama to’o iha ne’ebé”, nia rekomenda.
MI hatutan, antes ne’e nia hateten katak lista membru PNTL ne’ebé mak hetan promovidu nia tenke simu husi komandu.
“Informasaun hotu-hotu ha’u tenke simu husi komandu, kona-ba ida-ne’e husik ona ba Julia da Gama intende saida mak ne’ebá, ita lalika halo polemika tun sa’e komandante jerál sesante na’in-rua mós remata sira nia servisu halo hotu ona, ita husik ona hateke ba oin para rezolve problema”, Ministru Interiór Francisco hateten.
Nia afirma, relasiona problema ida-ne’e husik ba iha Ministériu Interiór mak rezolve. “MI horseik hasoru malu ona komandante jerál foun, ne’ebé ita entrega ba Komandu jerál foun na’in-rua mak sira sei informa bá ha’u, sira mak sei buka solusaun sira ne’e, sira promete ona sira sei rezolve problema sira ne’e ita entrega ona depois mak ita haree”, Ministru Francisco haktuir.
Tuir nia, iha despaixu ne’e buat hotu tau iha ne’ebá la presiza ko’alia, entrega ba komandante jerál foun kona-ba ofisiáis superior Julia da Gama nia kazu nia labele ko’alia, kuandu fila-fali halo didiak nia mós aban bainrua líder di’ak ida.
Ministru Interiór, informa ona bá komandante jerál foun sira prontu rezolve problema ida ne’e, sira na’in-rua iha kapasidade atu rezolve depois sira informa fali.
MI Garante Sei La Iha Intervensaun Polítika Ba Servisu PNTL
Ministru Interior (MI) Francisco da Costa Guterres hateten, nia garante durante komandante jerál Polísia Nasionál Timor-Leste (PNTL), Komisariu Asistente Polísia Afonso dos Santos sei la iha intervensaun polítika.
Ministru Interiór Francisco da Costa Guterres informa, hakarak polísia ne’ebé servisu profesionál, kumpri regra no orden komandu, nune’e sei la halo intervensaun polítika.
“Sim, sei la halo intervensaun ba Komandu jerál nia servisu, ne’e loos, ita polítika labele ba politiza fali PNTL, mais kestaun servisu ne’ebé mak ligasaun ho institusional ne’e iha. Ne’ebé sei la halo intervensaun iha nia mandatu, tanba ita hakarak polísia ne’ebé profesionál, se ita hakarak polísia ne’ebé kumpri regra la’o tuir regra labele rona ema arbiru, selae polísia ne’e la ba oin ida,” Ministru Interiór (MI) Francisco da Costa Guterres iha Palásiu Governu, Kuarta (01/04/2026).
MI hatutan, kona-ba prosesu rekrutamentu kadetes foun ne’ebé sei mai mós MI la halo intervensaun, tanba ne’e uluk kedas entrega ba sira no tuir rezolusaun ne’ebé sai katak komisaun juri sei mai husi ema internasionál, PNTL no mós Komisaun Funsaun Públika (KFP), nune’e Ministériu interior sei la interven.
“Sim, sei lae, ida-idak la’o tuir nia regra, lei iha, PNTL tutela ba Ministériu Interiór sim, nia irarkia ne’e iha, nune’e sira iha nia regra prosedimentu. Mais prosesu ne’e estatutu ko’alia klaru, sira sei servisu bazeia ba despaisu ministerial, despaisu ministerial la signifika Ministru ba interven, despaisu ministerial ne’e atu deside de’it kona-ba ninia prosedimentu, ninia kritériu, no kona-ba juri, komisaun supervizaun, restu ne’e komandu mak la’o, la’ós Ministériu mak halo”, governante ne’e afirma.
Relasiona ho proposta Komandante Jerál PNTL Komisariu Asistente Polísia Afonso dos Santos ne’ebé propoin kadetes PNTL efetivu 750 ne’e, Ministériu Interiór aseita no hein karta husi komandu jerál hafoin ba aprezenta iha Konsellu Ministru.
“Husu rekrutamentu 750 ne’e la iha problema, ne’e sira mak intende liu ida ne’ebá, depois, nia sei hakerek karta ba ha’u, depois ha’u lori ba konsellu Ministru. Loos rekrutamentu ne’e la’ós iha Ministériu Interior nia okos, iha duni komandu jerál nia okos, no ami kria de’it komisaun supervizaun para atu haree”, Ministru Interiór haktuir.
Kona-bá abertura ba prosesu rekrutamentu re-teste ba kadetes PNTL, sei hahú depois de semana Santa paskua nia remata hafoin públika.
Jornalista: Juvinal Cabral dos Santos