Jesus Fase Eskolante Sira Nia Ain Nu’udár Simbolu Serbí ho Domin no Haraik An

Hatutan.com, (02 Abríl 2026), Díli- Selebrasaun misa Kinta-Feira Santa iha Kapela  São José, Aimeti-Laran, Aimutin, Díli, haktuir liturjia kona-bá Jesus fase eskolante 12 sira-nia ain.

Lee Mós: Kinta-Feira Santa Hanesan Simbolu Domin Serbí no Haraik Aan

Jesus fase eskolante sira-nia ain. Foto/Repro.Espesiál

Simbolu ne’e, tuir Padre selebrante Joel  Casamiro, OFM, katak nu’udár kalan ikus han hamutuk Jesus Kristu hodi fase Nia eskolante sira nian ain hodi hatudu serntidu serbí nia atan sira ho domin no haraik an.

Padre Joel  Casamiro OFM iha nia omilia hateten,  selebrasaun misa Kinta-Feira Santa kona-bá fraternidade mundu nian no ida-ne’e simboliza Jesus entrega an total nu’udár domin ba Maromak no sakrafisiu domin nian ba nia ema hodi hadomi nia ema to’o saran an ba mate iha kruz.

“Iha eukarisitia Jesus falunaan no fase ain nu’udár sakrifisiu no sinseru nu’udár atan ne’ebé serbí ho haraik an. Fase ain hatudu mai ita katak Jesus maské mestri maské Na’i iha obrigasaun atu serbí nia  atan sira, serbí sé de’it ho neon ho laran, ho haraik an no dedikasaun tomak,” Padre Joel  Casamiro OFM hateten, Kinta (02/04/2026).

Nia esplika kalan Kinta-Feira Santa halo memoria ba instituisaun sakramentu boot ida mak ne’e mak eukaristia, no iha momentu ida-ne’e, ema hotu-hotu  selebra instituisaun sakramentu ordem nian ne’ebé naksulin hodi Jejus Kristu Nia ministériu  sasordote ne’ebé tuun mai ema hotu.

“Jesus Kristu hanorin ita kona-bá lei ne’ebé aas liu lei hotu-hotu mak lei domin, laiha tán lei seluk ne’ebé aas liu, katak hadomi Na’i Maromak ho neon ho laran tomak, no hadomi o nia maluk sira hanesan o nia aan rasik,” Padre Joel  Casamiro OFM hateten.

Selebrasaun misa kalan  Kinta-Feira Santa konvida mós sarani hotu, atu hamoris fila-fali momentu ikus sira molok nia rende ka entrega nia an no mate tán ita ema, ita hanoin fali kalan ne’ebé jesus han hamutuk kalan ikus nian nu’udár simbolu domin nian.

Tuir observasaun Hatutan.com iha selebrasaun  misa kinta-feira santa, iha Kapela São Jose Aimeti Laran, Aimutin Díli, hetan partisipasaun masimu husi sarani sira.

Jornalista: Zita Menezes