Governu Prepara Orsamentu Retifikatívu Bá Responde Nesesidade Urjente

Hatutan.com, (13 Abríl 2026), Díli–  IX Governu konstitusionál liu-husi Ministériu Finansas (MF) halo ezersísiu no prepara  orsamentu Jerál  Estadu (OJE)  retifikatívu bá tinan 2026 hodi responde  bá krize ekonómia  no kombustivel iha Timor-Leste efeitu husi  funu iha Médiu Oriente.

Lee Mós: Posibilidade Timor-Leste Enfrenta Diminui Asesu Eletrisidade Oras Neen Kada Loron

Ministra Finansas, Santina José Rodrigues Ferreira Viegas de Cardoso. Foto/Marcelino Tomae

Ministra Finansas, Santina José Rodrigues Ferreira Viegas de Cardoso, Segunda (13/04/2026),  hatete  Governu daudaun sei halo hela ezersísiu atu prepara alterasaun bá Orsamentu Jerál Estadu (OJE) liuhusi mekanizmu orsamentu retifikatívu.

“Agora dadaun ha’u seidauk iha informasaun kompletu, tanba ami sei halo hela ezersísiu bá  orsamentu retifikatívu. Polítika Governu nian, orsamentu ne’e tenke mai nafatin husi Orsamentu Estadu,” Ministra Finansas, Santina José Rodrigues Ferreira Viegas de Cardoso, haktuir  Jornalista sira hafoin  enkontru ho Prezidente Repúblika José Ramos-Horta iha palásiu Prezidensiál,Díli.

Nia hatutan tanba  tuir orientasaun Konsellu  Ministru bá  Ministériu Finansas halo análize no preparasaun téknika kona-bá mudansa orsamentu ne’ebé iha. Tanba ne’e MF halo ezersísiu  sei fó prioridade liubá área estratéjiku sira hanesan seguransa ai-han, ne’ebé daudaun sei  halo kooperasaun  ho Ministériu  Agrikultura  Peskas no Ministériu Koordenador  Asuntu Ekonomia,  atu responde krije ekonómia íha rai laran ne’ebé  impaktu husi funu iha Estadus Unidus Amérika-Israel ho Iraun.

Membru  IX Governu Konstitusionál ne’e subliña tan katak, orsamentu  retifikatívu ne’e mós  liga asuntu kombustível tama iha prioridade Governu nian, ho koordenasaun liu-husi Ministériu  Petróliu no Rekursu Minerais atu asegura estabilidade fornesimentu kombustível  nasionál.

Nia  esplika tan katak depois ezersísiu,  Governu defini ona medida sira, proposta orsamentu retifikatívu sei aprezenta ba Parlamentu Nasionál  atu hetan diskusaun no aprovasaun tuir lei ezekusaun orsamentu Estadu nian.

Jornalista: Marcelino Tomae