Justisa & Krime
Vítima Sira Depozita Osan Ba SnapBoost Submete Keixa Ba PNTL-PCIC
Hatutan.com, (14 Abríl 2026), Díli-Vítima ho modu depozita osan iha SnapBoost bele rezulta hetan osan doubru submeter keixa ba Polísia Nasionál Timor-Leste (PNTL) ho Polísia Sientifiku Invetigasaun Kriminál (PCIC).
Vítima ba SnapBoost ne’ebé husu publika nia identidade ho inisiál ZV informa nia tama ho osan US$34.00 liuhusi nia bin, maibé sente sai vítima tebes tanba sira uma laran ka relasaun família hamutuk na’in-30 resin mak tuir. Tanba ema bosok tama SnapBoost deposzta osan US$1000.00 sei hetan fali osan funan US$1000.00 nune’e atrai tebes hodi tuir.
“Uma laran ami barak loos kuaze na’in-30 resin ne’e mesak primu, prima, tiu, tia, tuir hotu kedas, ne’e seidauk sura ho kolega sira, ami nia grupu SnapBoost agora dadaun kuaze ema hamutuk 5000-resin,” vítima ZV ba Hatutan.com, Tersa(14/04/2026).
Vítima hatutan, bin tama Sna Boost ne’e rona husi ema ne’ebé mak lori tama mai Timor-Leste ho nia naran inisiá JF servisu iha Hospital Nasionál Guido Valadares (HNGV).
“Antes ami tama ne’e nia loke seminár boot ida iha katedral, depois nia esplika osan foti iha SnapBoost ne’e depois nia hatudu nia evidensia sira foti osan ne’e, foto, ne’e mak ami mós fiar tama, ami hahú ho osan US$34.00,” ZV haktuir.
Nia dehan, depois liutiha fulan hira mak sira dehan iha bonus 100% ezemplu hanesan depozita US$1000.00 entaun nia funan US$1000.00, husi ne’eba mak ema depozita rame-rame ho osan boot.
Iha esplikasaun no kompromisu katak bainhira depozita osan iha fulan-Janeiru maka automatika foti nia jurus 100% iha fulan-Abríl, maibé depois to’o loron no fulan ne’ebé determinadu ba foti osan la tama no adia hela de’it to’o agora.
Ema barak mak depozita osan iha fulan-Janeiru, maibé to’o fulan-Abríl atu foti osan funan ne’e seidauk de’it. Iha balun mak foti duni maibé barak mak seidauk ema sira tama ho osan boot atu hetan bonus 100% ne’e mak la di’ak to’o agora ne’e.
“Osan ha’u fó ba ema ne’ebé mak nia konta bankaria iha Indonézia depois dehan sira mak transfer tutan fali ba ema iha Indonézia ne’ebá nia rekening, ha’u depozita US$34.00 de’it, bin sira mak US$1000.00 hotu, to’o agora seidauk foti fali osan bonus, no maun ida tan mak US$25,000.00 kedas, nia osan totál agora US$50,000.00 maibé atu foti la di’ak,” vítima ZV haktuir.
Vítima ba SnapBoost ne’e hateten, iha Segunda (13/04/2026), sira organiza malu ba ona PCIC hodi submete keixa.
“Ema haruka ami lori dadus bá ne’e mak ami agora dadaun halibur hela dadus vítima sira ne’e depois kompletu tiha mak ami lori fali bá prosesa,” nia informa tan.
Nia hatutan, agora pesoál ne’ebé lori Snap Boost mai Timor-Leste ho inisiál JF ne’e agora kalan neen ona la toba ona iha nia uma, agora nia uma mós rai mamuk ema buka nia iha nia uma mais nia la iha.
Iha sorin seluk Porta-vós Polísia Nasionál Timor-Leste (PNTL) Superintendente-Xefe Polísia João Belo dos Reis, informa vítima ba modu SnapBoost sidadaun na’in-rua submete keixa ba Polísia Nasionál Timor-Leste (PNTL) liu-hosi Diresaun Servisu Investigasaun Kriminál (DSIK) atu buka tuir autór.
“Ami simu ona keixa husi Vitima na’in-rua ne’ebé sente ofendidu tanba ami buka hela maluk sira seluk ne’ebé sente ofendidu ka lakon nia rikusoin hanesan osan bele mai halo keixa ba asaun ida-ne’e para ami buka tuir autór sira ne’e,” Porta-vós PNTL, Superintendente-Xefe Polísia João Belo dos Reis hateten.
Iha oportunidade ne’e mós Polísia Nasionál Timor-Leste hanesan Autoridade Seguransa husu ba públiku liu-liu Inan-Aman sira iha Munisípiu ka Postu-Administrativu, Suku no Aldeia sira katak labele fiar arbiru ba publikasaun informasaun ka ema ruma fó hatene iha relasaun ba investimentu osan ne’ebé laiha baze legál.
“Ami mós agora dadaun buka hela informasaun ne’ebé agora ita nia sidadaun sira sai vítima, ami mós verifikaona aplikasaun ne’ebé mak autór sira utiliza ne’e la rejista iha Play Store signifika aplikasaun ne’e illegal,” Superintendente-Xefe Polísia João Belo dos Reis hateten.
“Ami husu ba públiku atu kuidadu tanba iha tempu modernu aplikasaun barak no lohi malu mós barak rezulta vítima mós ba modu operandu ida ne’e. Tanba ita nia vítima sira kada ema hatama osan US$30.00, no balun US$35.00 to’o balun depozita US$2000.00, ne’ebé ita sei buka hotu sira ne’ebé mak ofendidu bele hato’o keixa ba ita depois ita bele prosesu ba iha Tribunál,” João Belo dos Reis hateten.
PNTL sei mantein kontaktu ho Banku Sentral Timor-Leste (BCTL) tanba sira mak regulariza atividade negósiu iha relasaun ba banku ninian, nune’e mós autoridade seguransa sei buka referensia ba nasaun seluk ne’ebé uza métodu hanesan ne’e karik bele justifika ba prosesu investigasaun ne’ebé agora dadaun lao hela.
Jornalista: Juvinal Cabral dos Santos