Presiza Hadi’a Prosesu Investigasaun Bá Kazu Fujitivu Kalumban Mali

Hatutan.com, (16 Abríl 2026) Díli– Primeiru-Ministru Kay Rala Xanana Gusmão hateten presiza hadia prosesu investigasaun bá  kazu fujitivu Kalumban Mali  tanba nia halai husi justisa ba hela iha Timor-Leste to’o deskonfia falsifika dokumentu hodi hetan nasionalidade Timorense.

Lee Mós: Ema ho Podér Polítiku Proteze no Fó Kondisaun Ba Fujitivu Kalumban Mali iha Timor-Leste

Fujitivu Kalumban Mali ne’ebé uluk sai mós kandidatu husi Partidu Amanat Nasional ba membru Parlamentu Nasionál ka PDRD Provinsia Kupaun-Timor Osidentál. Imajen/Repro.Espesiál

Kalumban Mali deskunfia atual iha Timor no sai sidadaun Timoroan ho identidade Leonardo Benigno Tilman, nu’udár fujitvu  husi Prokuradoria Timor Osidentál ka Nusa Tenggara Timur (NTT)-Indonézia, halai husi justisa hodi mai hela iha Timor-Leste dezde tinan 2023.

Kalumban Mali ne’ebé deskonfia falsifika dokumentu hodi hetan nasionalidade Timor ho identidade Leonardo Benigno Tilman,  hetan sentensa husi Painél Juis Tribunál Krime Korrupsaun ka  Pengadilan Tindak Pidana Korupsi (Tipikor) Kupang-Indonézia,  tinan-15 prizaun efetivu iha tinan 2016. Maibé, proses julgamentu bá kazu ne’e ho karater  in-absénsia ho ajenda akuzasaun final,  Kalumban Mali halai lakon to’o ohin loron.

Kalumban Mali sai hanesan fujitivu ka DPO (Daftar Pencarian Orang) Prokuradoria NTT ho Prokuradoria Jerál Repúblika Indonézia nian dezde tinan 2016.

Primeiru Ministru, Kay Rala Xanana Gusmão hatete  katak Kazu ida-ne’e presiza  haree didi’ak no hadi’;a investigasaun.

“Ida-ne’e sé  Kalumba Mali sidadaun Indonézia ne’ebé troka naran sai sidadaun Timor,  ne’e mak buka hadia, tanba uluk ne’e Xina hetan pasaporte ita nian. La hatene Tetum tan, ne’ebé buat sira ne’e hotu, tanba arbiru de’it mak agora ne’e buka atu rezolve,”  PM Kay Rala Xanana Gusmão  responde Hatutan.com  hafoin  enkontru semanál ho Prezidente Repúblika José Ramos-Horta iha palásiu Prezidensiál, Díli Kinta (16/04/2026).

Kazu fujitivu Kalumban Mali ne’ebé deskonfia falsifika dokumentu hodi hetan nasionalidade Timor ho naran Leonardo Benigno Tilman, sai sensitivu no dilemátiku ba Polísia Sientifiku Investigasaun Krminál (PCIC, sigla portugés)  tanba ema ho podér politíku no ema balun tan  ho pozisaun boot mak proteze no fó hela kondisaun ba Kalumban Mali hodi la’o livre iha Timor-Leste.

Kalumban Mali, envolve kazu fornesimentu adubu ka pupuk ho kuantidade tonelada  575 ho valor orsamentu millaun Rp 976.

Kalumban Mali nu’udár Diretór CV Eka Cipta Persada ne’ebé hetan detensaun dezde loron 28 fulan-Fevereiru 2014. Molok ne’e, iha fulan-Jullu tinan 2013, Kalumban Mali sai hanesan kandidatu membru lejislativu husi  Partidu  Amat Nasonal (PAN) bá DPRD-NTT.

Diretór Nasionál PCIC,  Vicente Fernandes e Brito, Sesta 20 fulan-Fevereiru tinan 2026,  bá  Hatutan.com  informa katak kazu fujitvu Kalumban Mali ne’e sensitivu liu.

“Kazu bá fujitvu Kalumban Mali ne’e sensitivu liu, tanba ema-boot de’it mak backing ka apoiu no fó kondisaun, tanba ne’e, difisil bá PCIC hodi halo servisu investigasaun bá kazu ne’e,”  Diretór Nasionál PCIC Vicente Fernandes e Brito hateten.

Nia afirma kazu fujitvu Kalumban Mali nian ne’e, PCIC la kontinua investigasaun kleur ona, ho razaun maka sensitivu, tanba  fujitvu ne’e rasik sadere metin ho figura importante balu iha Timor.

Fó hanoin fali katak iha Kuarta, 05 fulan-Juñu tinan 2023,  hale’u tuku 16:00 Otl, PCIC halo kapturasaun no detensaun ba  fujitivu Kalumban Mali  iha nia rezidénsia Fomento, Díli.

Autoridade PCIC kaptura no detein fujitivu Kalumban Mali relasiona ho informasaun katak  dekonfia nia kaer ilegalmente dokumentu sidadania Timor nian  hodi troka nia naran ba  Leonardo Benigno Tilman husi Munisípiu Bobonaro.

Iha detensaun no kapturasaun ne’e, PCIC asegura dokumentu importante sira hosi Kalumban Mali alias Leonardo Benigno Tilman, hanesan sertidaun Nascimento ne’ebé deskonfia atribui  husi indivíduu ida iha Ministériu Justisa Timor-Leste, Billete Identidade Timor-Leste no sertidaun kazamentu husi Parókia ida ne’ebé hola parte iha Arkidioseze Metropolitana Díli.

Fujitivu Kalumban Mali nia orijen husi Lamaknen, Postu Administrativu Atambua, Provínsia Kupang, Timor Osidentál ka NTT (Nusa Tengara Timur).

Tuir família balun Kalumban Mali nian ne’ebé Hatutan.com hasoru (tanba kestaun seguransa la bele publika fontes ne’e nia identidade)  iha Díli, Kuarta 26 Juñu 2025, informa katak nia koñese Kalumban Mali tanba sira-na’in rua nia inan bin-alin. Maibé, nia lahatene paradeiru fujitivu Kalumban Mali nian iha Timor-Leste.

Família husi Kalumban Mali ne’e haktuir iha tinan 2024, Kalumban Mali sei vizita nia, maibé to’o agora lakon ona kontaktu no nunka vizita nia.

Jornalista: Marcelino Tomae