Ministru José Honório Jerónimo Hakotu Iis Tanba Atake Kardíaku

Hatutan.com, (21 Abríl 2026), Díli- Ministru Ensinu Superiór, Siénsia no Kultura (MESSC, sigla portugés), José Honório da Costa Pereira Jerónimo, Tersa (21/04/2026), hale’u tuku 13:00 Otl, hakotu iisiha  gabinete  tanba  atake kardíaku.

Matebian Ministru Ensinu Superiór, Siénsia no Kultura (MESSC, sigla portugés), José Honório da Costa Pereira Jerónimo. Foto/Espesiál

Informasaun husi fontes sira iha Edifisiu MESSC katak Ministru José Honório  Jerónimo, sente ladún di’ak iha nia eskritóriu, tanba moras iha parte hirus matan, ho nune’e, husu atu ba Ospitál Nasionál  Guido Valadares, maibé derrepenti monu no liu minitu 30 evakua ba HNGV  labele salva tanba iis laiha ona.

Molok asume kargu hanesan Ministru, José Honório da Costa Pereira Jerónimo hala’o knaar nu’udár profesór (Dosente) universitáriu iha Universidade Nasionál Timor-Leste (UNTL).

José Honório da Costa Pereira Jerónimo moris iha Bazartete, Munisípiu Liquiça, iha loron 15 fulan Fevereiru tinan 1973.

Iha tinan 2001, graduadu iha Estudu Dezenvolvimentu husi Institutu Teknolojia no Siénsia Mandala iha Indonézia, kompleta Mestradu iha Estudu Dezenvolvimentu iha Universidade Kristen Satya Wacana, Salatiga (Indonézia) iha tinan 2010.

Hahú tinan 2001, nu’udár dosente iha Fakuldade Ekonomia iha Departamentu Ekonomia no Estudu Dezenvolvimentu iha Universidade Nasionál Timor Lorosa’e (UNTL), iha ne’ebé nia okupa kargu lideransa oi-oin. Nomeadamente ba Xefe Departamentu Ekonomia no Estudu Dezenvolvimentu (2004-2006), Dekanu Fakuldade Ekonomia (2006-2008), Vise-Dekanu Asuntu Estudante iha Fakuldade Ekonomia no Jestaun (2011-2013), Pro-Reitór Administrasaun, Planeamentu no Finansas (2016-2020) no Pro-Reitór ba Inspesaun, Auditoria no Kontrolu Kualidade (2021-2023).

Nu’udár membru Konsellu Jerál UNTL husi tinan 2015 to’o 2016. Servisu nu’udár Adidu Komérsiu iha Embaixada Repúblika Demokrátika Timor-Leste iha Jakarta, Indonézia (2013-2015).

Desde tinan 1994, nia nu’udár membru ba organizasaun estudante “Rezisténsia Nasionál Estudante Timor-Leste” (RENETIL), ne’ebé harí iha tinan 1988 hosi estudante Timoroan sira iha Indonézia ho objetivu atu luta ba independénsia Timor-Leste nian.

Iha loron 01 fulan-Jullu tinan 2023, nia simu pose nu’udár Ministru Ensinu Superiór, Siénsia no Kultura hosi IX Governu Konstituisionál RDTL nian, responsável ba konsepsaun, ezekusaun, koordenasaun no avaliasaun polítika nian ba área sira ensinu superiór no kualifikasaun nian, no mós ba área sira siénsia no teknolojia nian.

Nu’udár Ministru, nia lidera inisiativa relevante sira iha setór Ensinu Superiór, nomeadamente aprovasaun ba Lei Báziku Ensinu Superiór nian, ne’ebé aprova hosi Konsellu Ministru iha fulan-Fevereiru 2024 no hosi Parlamentu Nasionál iha fulan-Juñu 2024. Nia mós hala’o ajenda ativu ida hosi kooperasaun internasionál, hodi nune’e bele estabelese parseria sira ba programa formasaun bolseiru sira no ba estudante tékniku no tékniku Timoroan sira.

Primeiru-Ministru Kay Rala Xanana Gusmão ho membru Governu no membru Parlamentu Nasionál sira  ba vizita no reza ba maktoban iha mortuáriu HNG.

 Funsionáriu sira MESSC ho estudante sira husi UNTL inklui família sira to’o hotu ona iha HNGV hodi reza no hein seremónia ofisiál hodi lori maktoban ba rezidénsia iha Munisípiu Liquiça.

Jornalista: Macelino Tomae