SEFOPE Propoin Hasa’e Saláriu Minimu husi $115 Ba $160x

Hatutan.com, (23 Abril 2026), Díli- Sekretária Estadu Formasaun Profisionál no Empregu (SEFOPE), hamutuk ho empregador, traballadór no mós ho Ministériu relevante sira deside ona  ezbosu lei saláriu minimu hasa’e  husi $115 ba $160/fulan.

Foto: Espesiál

Diretór Jerál SEFOPE, Carlito do Rosário Cabral, Kinta (23/04/2026), hafoin halo audiénsia ho Komisaun F Parlamentu Nasionál ne’ebé trata asuntu Saúde, Seguransa Sosiál no Igualdade Jeneru, informa SEFOPE halo diskusaun ho Komisaun F  relasiona ho ezbosu lei saláriu minimu, ne’ebé sai preokupasaun   boot ba traballadór sira, liuliu traballador sira iha setór privadu.

Preokupasaun traballadór sira-nian husu hasa’e saláriu minimu ne’e mai nanis iha tinan 2012 no iha Lei Traballu Kódigu Laboral define saláriu no vigora hela saláriu minimu kada fulan $115.

“Depois situasaun ne’e la’o to’o ohin loron iha mudansa barak liuliu iha vida ekonomia, iha progresu situasaun ekonomia iha rai-laran, entaun SEFOPE hanoin atu halo mudansa ba saláriu minimu,” Diretór Jeral SEFOPE Carlito do Rosário Cabral  hateten.

Iha semana kotuk SEFOPE halo ona enkontru ho traballadór, empregadór no pareser husi Ministériu relevante, no mós parte Servisu Estatistika Ministériu Finansas, bazeia ba sira nia estudu no sira nian survey nune’e deside hodi submete fila-fali ezbosu saláriu minimu ba iha Ministériu Koordenador Asuntu Ekonomia (MCAE).

SEFOPE husu para iha tempu badak MCAE bele submete ezbosu lei saláriu minimu  ba iha Konsellu Ministru bele halo diskusaun no envia  mai iha Parlamentu Nasionál aprova hodi bele aplika ba iha traballadór sira.

SEFOPE nia  espetativa bele iha  tinan ida-ne’e para iha mudansa ruma, kona-bá saláriu minimu, liuliu traballadór sira iha setór privadutanba preokupasaun sira ne’e kle’ur ona.

“Depois rona hotu pareser sira ne’e ita propoin saláriu minimu ba traballadór sira mak $160/fulan. La’ós SEFOPE de’it maibé entre empregadór no traballadór hamutuk mak hodi dezide esbosu lei saláriu minimu ne’e,” Carlito do Rosário Cabral informa.

Jornalista : Zita Menezes