Hatutan.com, (18 Abríl 2026), Díli–   Tribunál Judisiál Primeira Instánsia Díli (TJPID), Sábadu (18/04/2026), liuhosi julgamentu primeira interogatóriu aplika medida koasaun prizaun preventiva  bá Arguidu na’in  inisiál  WYF, JT  no  WY   ne’ebé deskonfia produs falsu US$100.00 ho total tokon US$4-resin.

Lee Mós: Kazu Osan Falsu Millaun US$4-resin, Presiza Investigasaun Kle’an

Polísia lori arguidu na’in-tolu husi Tribunál ba kumpre prizaun preventiva, Sábadu (18/04/2026). Foto/Juvinal Cabral dos Santos

Arguidu na’in-tolu ho nasionalidade Xina  ne’e sia hanesan jerente importante iha kompañia Y&W, ho kompozisaun arguida WYF, nu’udar Diretora Ezekutiva, Arguidu JT nu’udar Manejer ho Arguidu WY, nu’udár  xefe armajen.

Durante Julgamentu ne’e,  arguidu   na’in tolu la onestu bá prova  sira ne’ebé  Ministériu Públiku aprenzenta, tanba  Tribunál intende katak  evidénsia ne’ebé Ministériu Públiku aprezenta provadu duni.

Durante Julgamentu  Advogadu sira husi   arguidu na’in-tolu halo promosaun  bá Tribunál  atu aplika koasaun médida patrimonial, maibé tribunál intende arguidu sira ne’e mai husi rai-li’ur, Ministériu Públiku omologa  bá tribunál  hodi aplika prizaun preventiva.

Ministériu Públiku liuhusi Prokuradór  Domingos Goveia Leite alega arguidu na’in tolu bá  krime rua  hanensan bá krime falsifikasaun ba dokumentu ka anotasaun téknika ne’ebé previstu iha artigu 303  Kódigu Penál Timor-Leste  no krime kontrafasaun moeda  previstu  iha  artigu 307  Kódigu Penál Timor-Leste.

Hafoin tribunál   hatun   despaisu hodi aplika prizaun preventiva bá arguidu na’in-tolu, Advogadu Privadu  Pedro Camões ne’ebé fó asistensia legal ba arguido sira,  informa  bá Jornalista  katak durante loron-30 nia laran  sei halo rekursu,   hodi kontra desizaun tribunál tanba konsidera desizaun ne’e  la adekuadu bá  sira nia Kliente na’in-tolu.

“Maibé komu tribunál aplika ona prizaun preventive, ohin Sabádu  no aban Domingu, komu dokumentu mós ami seidauk simu  sei halo rekursu iha loron ne’ebé ami simu durante loron 30 nia laran,”  Pedro Camões hatete.

Nia afirma, tuir loloos Tribunál ne’e bele fó  desizaun ne’e aplika de’it lei, labele foti  médida ida tanba de’it razaun ema ne’e mai husi rai-li’ur  tanba de’it razaun Xinés.

Nia fundamenta,  justisa ne’ebé loloos liu maka ne’e, kuandu osan falsu ida ne’e sirkula ka lae infelizmente dokumentu hothotu polísia bá foti iha armajen  tanba  Polísia iha faze preventiva  la sorkula iha merkadu.

Nia rekoñese osan falsu ne’e iha duni, baibain uza bá animasaun,  no uzu bá atividade seluk, maibé la’ós bá merkadu nian. Tanba ne’e, desizaun tribunál aplika Prizaun Preventiva arguidu na’in-tolu ne’e la adekuadu,  tanba prova hothotu  iha Ministériu Públiku nia liman  tanba ne’e  hanensan advogadu  bá arguidu na’in tolu la ta’uk atu halo rekursu.

Nia  afirma katak, kuandu advogadu na’in tolu ne’e,  simu ona Dokumentu  hothotu, durante loron 30 nia laran sei halo rekursu hodi kontra desizaun tribunál ne’ebé aplika prizaun preventiva bá arguidu na’in-tolu.

Julgamentu  bá Primeiru Interogatoriu ne’e prezide husi Juiza Ana Palu Fonseca,  no arguidu  na’in -tolu  hetan  asisténsia legál husi Advogadu Privadu na’in -tolu hanesan   Pedro Camões, Otávio Cardoso ho João Dun.

Iha loron 15 Abríl 2026, Polísia Nasionál Timor-Leste (PNTL) liu husi Diresaun Servisu  Investigasaun Kriminál  (DSIK) ezekuta mandadu buska husi Ministériu Públiku (MP) ba armajen Y&W iha Bidau, Díli, no deskobre osan falsu ho montante tokon US$4 -resin .

Armajen Y&W ne’e lokaliza iha Aldeia Sagrada Família, Suku Bidau Santana, Postu Administrativu Cristo Rei, Munisípiu Díli. Iha prosesu buska no apreensaun ne’e DSIK detein suspeitu sira nu’udar sidadaun estrenjeiru na’in-haat.

Polísia halo tiha buska no apreensaun ne’e  lori kedas evidénsia  osan falsu no asegura sidadaun sidadaun estranjeiru na’in-haat nu’udar taballadór iha ba loja no armajen  Y&W hodi ba halo indentifikasaun no submeter ba investigasaun iha edifísiu Diresaun Servisu Investigasaun Kriminál iha Kuartel Jerál PNTL.

Jornalista:Marcelino Tomae/Juvinal Cabral do Santos