Apaga Notísia husi Konta Facebook Ofisiál RTTL, Rosário Maia: “Ne’e Problema Internál, Ami Buka hadi’a”

Hatutan.com, (27 Abríl 2026), Díli–Prezidenti Konsellu Administrasaun Ràdiu Relevizaun Timor-Leste, Empreza Públika (RTTL,E.P), Rosário da Graça Maia, konsidera aktu “sensura” apaga notísia husi konta Facebook RTTL Roman ba Nasaun – LIVE TV nu’udár problema internal no nia parte buka hadi’a.  

Lee Notísia: SEKOMS Expedito La Akompaña Ona PM Xanana Ba Singapura, Iha Malázia Deskonfia Xanana “Duni” Expedito

Notísia RTTL nian kona-bá afirmasaun PM Xanana dehan Nia La Husu SEKOMS Akompañia nia viajen sira iha rai-laran ho rai-li’ur, edisaun Kinta-kalan, 23 Abríl 2026, ne’ebé partilla iha kontra Facebook RTTL Roman ba Nasaun – LIVE TV maibé apaga tiha ona. Foto/Repro

Notísia  RTTL nian iha edisaun Kinta-kalan, 23 Abríl 2026, kona-bá “Primeiru-Ministru Xanana Gusmão La Husu SEKOMS Akompaña Nia Viajen sira iha Rai-Laran no Rai-li’ur”  ne’ebé partilla iha konta  Facebook ofisiál  RTTL Roman ba Nasaun – LIVE TV apaga derrepenti de’it husi konta Facebook refere hafoin ema u’ain halo reajen no kritika maka’ás hasoru SEKOMS Expdito Dias Ximenes.

Tuir observaun Hatutan.com ba konta Facebook  ofisiál RTTL Roman ba Nasaun – LIVE TV  relativa ho notísia SEKOMS nian ho titulu “Primeiru-Ministru Xanana Gusmão La Husu SEKOMS Akompaña Nia Viajen sira iha Rai-Laran no Rai-li’ur” loron tuir mai, Sesta, 24 Abríl, hae’u tuku 09:00 ka tuku 10:00 dadeer Otl, apaga derrepeneti la ho rajaun klaru tanba la fó sai nia disclaimer hodi fó hatene ba leitór sira kona-bá rajaun ka interese apaga notísia ho nia konteúdu hosi konta Facebook RTTL.  

Prezidente Konsellu Administrasaun RTTL,E.P, Rosário da Graça Maia, Segunda (27/04/2026), responde Hatutan.com iha nia servisu fatin, katak laiha intervensaun husi se deit ba redasaun RTTL no RTTL iha komprometeu atu tane as nia independénsia editoriál tuir baze legál ne’ebé iha.

“Kestaun apaga notísia ne’e asuntu internal ami nian, ha’u mós foin mai, ami buka atu hadia, entaun ha’u nia komentáriu maka ne’e de’it,  ha’u nia komentáriu  maka ne’e de’it. Obrigadu barak,”  Rosário da Graça Maia, nu’udár mós antigun jornalista RTTL no antigun prezidente Asosiasaun Jornalista Lorosa’e (AJTL) ne’e afirma.

Kona-bá deskonfia Sekretáriu Estadu Komunikasaun Sosiál Expedito  Dias Ximenes  mak fó orientasaun hamoos  notísia ne’e husi konta Facebook ofisiál Roman ba Nasaun – LIVE TV , Rosário da Graça Maia, dezmente ka lakohi  fó komentáriu.

“Ida-ne’e mós ha’u lakohi fó komentáriu,   sei ita boot konfirma ona SEKOMS  rasik, entaun ida-ne’e mós ha’u laiha komentáriu, maibé hanensan ohin ha’u dehan, ne’e asuntu internál, ha’u mós foin mai, ami tenta atu hadi’a,”  Rosário da Graça Maia afirma.

Iha sala VVIP Aeroportu Internasionál Prezidente Nicolau Lobato, Sábadu, 25 Abríl ne’e, Hatutan.com, hakbesik ba SEKOMS Expedito Dias Ximenes, hodi husu halo entrevista konfirmasaun (doorstop interview), maibé  SEKOMS Expedito Dias Ximenes la hatán no dehan,  “ha’u lakohi ko’alia ho ita-boot (jornalista Hatutan.com, red), orsida ita-boot bá inventa fali, hanesan foin dadauk ne’e,  Primeiru-Ministru la temi ha’u, o tau iha ne’ebá temi fali ha’u nia naran.”

Jornalista Hatutan.com mós responde hodi lia-tun dehan, RTTL,E.P mós publika noísia ho titulu no konteúdu hanesan ho notísia Hatutan.com nian, “PM Xanana La Husu SEKOMS Expedito Tenke Akompaña Nia viajen sira iha Rai-Laran no Rai-Li’ur”, Nune’e, SEKOMS  Expedito Dias Ximenes, hatán hodi dehan, “RTTL kopia  de’it  Hatutan nian, ha’u haruka hadi’a fali ona.”

Jornalista: Marcelino Tomae