Autoridade Indonézia ho Konsuladu Timor-Leste iha Bali Repatria Estudante Timoroan Nicodemos da Costa

Hatutan.com, (01 Abríl 2026), Díli-Autoridade Indonézia hamutuk ho Konsuladu Jerál Timor-Leste nian iha Bali, halo esforsu no deside haruka fila (repatria) estudante Timoroan Nicodemos da Costa tanba moris atu hanesan vagabundo (tunawisma/gelandangan) iha Surabaya.

kartaun estudante Nicodemos da Costa husi Univerasidade Pekalongan.

Informasaun ofisiál husi Konsul Jerál Timor-Leste nian iha Bali,  Carolina Maria da Silva, revela katak iha estudante  ida naran Nicodemos da Costa, husi Munisípiu Lautem, ne’ebé hela iha Pekalongan-Jawa Tengah, hanesan estudante iha Universidade Pekalongan, Jawa Tengah.

Tuir informasaun husi Dinas Sosial Provinsia Jawa Timur, haktuir katak estudante refere agora dadauk hela iha sidade  Surabaya no moris atu hanesan vagabundo (tunawisma/gelandangan)  ka laiha hela fatin no moris iha estrada ninin, inklui enfrenta difisensia mentál no presiza atensaun ba nia saúde.

Hafoin Konsul Jenerál Timor-Leste nian iha Bali, Carolina Maria da Silva,  simu relatóriu husi Dinas Sosial Provinsia Jawa Timur, makai ha loron 29 Abríl ne’e,  delegasaun  Konul Jenerál Timor-Leste iha Bali dezloka bá Surabaya atu fó asisténsia no atendimentu ba estudante refere.

Nicodemos da Costa nia pasaporte

Agora dadauk, Konsuladu Jerál Timor-Leste iha Bali sei halo prosesu atu haruka fila-fali  (repatria) estudante ne’e mai Timor-Leste liu husi Bali atu bele hamutuk ho familia.

Konsuladu Jerál Timor-Leste iha Bali husu ba maluk hotu , liuliu família ka kolega sira ne’ebé koñese Nicodemos da Costa, atu bele fó informasaun ba família atu fasilita informasaun ba Konsuladu Jerál Timor-Leste iha Bali razaun tanba Estudante refere laiha telefoni atu bele komunika ba família iha Timor-Leste ho nune husu maluk sira nia ajuda hato’o ba família  atu prosesu repatriasaun ba Dili ho aviaun Aero Dili.

Informasaun ne’ebé Hatutan.com asesa husi fontes balun iha Suarabaya katak Nicodemos da Costa nia aman naran Joaquim da Costa no nia inan naran Alcinda de Jesus. Nia husi Assalaino, Postu Administrativu Lospalos, Munisípiu Lautem.

Jornalista: Zita Menezes