Kazu Droga Sabu-Sabu, Tribunál Aplika Prizaun Preventiva Bá Arguidu CF

Hatutan.com, (01 Maiu 2026), Díli–  Tribunál Judisiál Primeira Instánsia Díli (TJPID) liuhusi juis José Araújo, aplika  medida koasaun prizaun preventiva bá arguidu ho naran inisiál CF  ne’ebé envolve iha prátika krime ilísitiu droga ho tipu sabu-sabu   ho kuantidade grama 1,040.

Lee Mós: PNTL Detein Suspitu Na’in-Lima Ba Kazu Droga

Polísia lori arguidu CF husi TJPID ba kumpre prizaun preventiva. Foto/Juvinal Cabral dos Santos

Ministériu Públiku reprezenta husi Prokuradór Matias Soares iha nia alegasaun husu Tribunál atu aplika medida koasaun prizaun preventiva ba arguidu CF hanesan sidadaun estranjeiru ho nasionalidade Xina ne’ebé deskonfia envolve iha krime tráfiku no atividade ilísita droga.

Tribunál konsidera iha indísiu forte kona-bá envolvimentu arguidu CF nian iha prátika krime tráfiku no atividade ilísita droga, tuir  lei númeru 2/2017, loron 25 Dezembru, ne’ebé aprova hodi kombate tráfiku no konsumu ilegál estupefasiente no substánsia psikotrópika iha Timor-Leste.

Advogadu Privadu  ne’ebé fó asistensia  legal bá arguidu CF, José Ximenes  husu  Tribunál hodi aplika aprezentasaun periódika    ho razaun  droga ne’e grama 1,040   hodi fa’an bá nia kolega.

Razaun  seluk Advogadu halo promosaun bá  Tribunál  atu  halo aprezentasaun periódidika tanba arguidu CF aluga rezidensia iha Fatuhada, fó servisu bá Timoroan, nune’e   bele fó espasu bá Ministériu Públiku ho autoridade seguransa kontinua halo investigasaun  kle’an.

Durante julgamentu primeira interogatoriu loron rua tuituir malu, Kinta-Sesta, 30 Abríl-01 Maiu 2026, arguidu CF komfefesa faktu ne’ebé Ministériu Públiku akuza loos.

Julgamentu ne’e juis Prezide José Araújo, Ministériu Públiku Reprezenta husi Prokuradór Matias Soares, Arguidu CF hetan asistensia legál husi Advogadu Privadu José da Costa Ximenes.

Jornalista: Marcelino Tomae/ Juvinal dos Santos