Eletridade Mate Beibeik Kauza Husi Alargamentu Estrada

Hatutan.com, (05 Maiu 2026), Díli– Ministru Obras Públiku (MOP), Samuel Marcal rekoñese ahi eletrisidade mate beibeik tanba kauza husi alargamentu estrada, nune’e mekanizmu hakoi fiu iha rai okos sei minimiza ahi mate iha futuru.

Tékniku EDTL,E.P hadi’a liña distribuisaun eletrisidade. Foto/Dok.Hatutan.com

“Ha’u rekonese katak ahi mate, la’ós ita rezolve iha tinan ida rua nian laran ne’e, prosesu ida ita sei han tempu tanba iha problema rua, ida mate tanba distánsia demanda ne’e sa’e bei-beik, seluk tanba distánsia entre supersasaun ida ba supersasaun ida mak dook demais entaun kauza ahi mate bei-beik iha Munisipíu sira,” Ministru MOP iha Parlamentu Nasionál, Tersa (05/05/2026).

MOP sei haree mekanizmu oinsá hodi aumenta tán supesasaun iha Munusipíu sira para hamenus ahi eletrisidade  mate bei-beik.

Membru Governu ne’e afirma Kapitál Díli komesa hahú ona (undergroung)  hakoi fiu iha rai okos, espera katak fin iha fulan ida-ne’e bele halo hahú testing ho mós supesasaun ne’ebé iha kuazé finaliza ona iha Comoro entaun rua ne’e sei inagura iha fin fulan ida-ne’e nian hodi minimiza ahi mate.

“Entaun ita bele dehan iha Díli bele minimiza ona ahi mate bei-beik, tanba energia ita nian demanda iha Díli mós boot tebe-tebes. Entaun ho tán Undergroung entaun ita espera katak ahi la mate bei-beik ona, ha’u husu deskulpa ba povu tomak tanba ho alargamentu estrada dalaruma ahi tenke mate bee tenke maran,” tenik Ministru MOP.

Nia afirma  Governu  tenke halo duni dezemvolvimentu  para hadi’a sidade sai  di’ak liu tanba Timor-Leste  iha  tinan 2029 sei sai uma-na’in ba simeria ASEAN.

Antes ne’e membru Parlamentu Nasionál sira mós iha reuniaun plenária loron Segunda-Tersa sempre preokupa bei-beik ho ahi eletrisidade ne’ebé mate bei-beik inklui komunidade sira mós preokupa bei-beik ba ahi eletrisidade ne’ebé mate lakan iha Munisipíu nomós iha kapitál Díli hodi estrada sira nian sasan eletroniká nomós halo atividade negosiu sira.

Jornalista : Zita Menezes