Breaking News: Deskonfia Ofisiál F-FDTL ho OPS Tiru Povu Nia Karau iha Lutu Laran iha Aldeia Halik

Hatutan.com, (13 Maiu 2026), Díli—Deskonfia, ofisiál membru FALINTIL-Forsa Defeza Timor-Leste (F-FDTL) hamutuk ho Ofisiál Polísia Suku (OPS) balun tiru  povu nia karau ne’ebé husik hela ihas lutu laran iha Aldeia Halik,  Suku Beco, Postu Administrativu  Suai, Munisípiu Covalima.

Povu nia karau ne’ebé pesoal membru F-FDTL ho OPS tiru iha rede laran iha Aldeia Halik, Suku Beco, Postu Administrativu Suai, Munisípiu Covalima. Foto/supply

Akontesimentu ne’e iha Segunda, 11 Maiu 2026, no tuir fontes sira informa katak parte sira ne’ebé tiru povu nia karau ne’e utiliza karreta ho númeur matrikula 211 bainghira husi Maliana hamutuk ho OPS halo operasaun iha Aldeia Halik.

Sasin sira ne’ebé husu atu la bele publika nia identidade tanba kestaun segurtansa, haktuir karreta ho numéru matrikula 211 mai husi Maliana tula ofisiál F-FDTL no OPS  tiru povu nia karau iha lutu laran no bainhira komunidade balun hase hodi husu tanbasá tiru karau sira ne’e, membru OPS ne’e (seidauk hetene nia identidade klaru) ameasa hikas komunidade ne’ebé haree atuasaun illegal ne’e tanba tiru povu nia karau haki’ak iha lutu laran.

Informasaun ne’ebé iha katak karau na’in sira hato’o ona keixa no aprezenta mós prova sira ba ona Komandante Jerál Polísia Nasionál Timor-Leste (PNTL), Komisariu Asistente Polísia Afonso dos Santos ho Xefe Estadu Maior Jenerál F-FDTL Tenente Jenerál Domingos Raúl “Falur Rate Laek”.

 Ekipa Hatutan.com