Ministru Interiór Husu Komunidade Halo Keixa Kontra Ofisiál F-FDTL ho OPS Ne’ebé Tiru Povu Nia Karau Iha Aldeia Halik

Hatutan.com, (13 Maiu 2026) Díli-Ministru Interiór (MI), Francisco da Costa Guterres, husu ba vitíma sira ne’ebé nia karau hetan tiru husi ofisiál membru FALINTIL-Forsa Defeza Timor-Leste (F-FDTL) ho Ofisiál Polísia Suku (OPS)  atu hato’o keixa.

Lee Mós: Breaking News: Deskonfia Ofisiál F-FDTL ho OPS Tiru Povu Nia Karau iha Lutu Laran iha Aldeia Halik

Ministru Interiór, Francisco da Costa Guterres. Foto/Juvinal Cabral dos Santos

“Komunidade halo relatóriu depois ami investiga, ne’e tenke hanesan ne’e prosedimentu mak ne’e, halo relatóriu mai keixa mai ita investiga para depois ita investiga sé nia uza sala,” Ministru Interiór (MI) Francisco da Costa Guterres  informa ba jornalista sira relativa ho kazu membru F-FDTL ho OPS balu tiru povu nia harau iha lutu laran iha Aldeia Halik, Suku Beco, Postu Administrativu Suai, Munisípiu Bobonaro.

Nia esplika PNTL ho F-FDTL iha nia  mekanizmu no prosedimentu Standard Operating Procedure (SOP) kona-ba uza kilat no uza munsoins. Ne’ebé kuandu nia failla iha ne’e sei hetan sansaun disiplinar ho ninia hipoteze.

Fó hanoin fali katak, deskonfia, ofisiál membru FALINTIL-Forsa Defeza Timor-Leste (F-FDTL) hamutuk ho Ofisiál Polísia Suku (OPS) balun tiru  povu nia karau ne’ebé husik hela iha lutu laran iha Aldeia Halik,  Suku Beco, Postu Administrativu  Suai, Munisípiu Covalima.

Akontesimentu ne’e iha Segunda, 11 Maiu 2026, no tuir fontes sira informa katak parte sira ne’ebé tiru povu nia karau ne’e utiliza karreta ho númeru matrikula 211 bainhira husi Maliana hamutuk ho OPS halo operasaun iha Aldeia Halik.

Sasin sira ne’ebé husu atu la bele públika nia identidade tanba kestaun seguransa, haktuir karreta ho numéru matrikula 211 mai husi Maliana tula ofisiál F-FDTL no OPS  tiru povu nia karau iha lutu laran no bainhira komunidade balun hase hodi husu tanbasá tiru karau sira ne’e, membru OPS ne’e (seidauk hetene nia identidade klaru) ameasa hikas komunidade ne’ebé haree atuasaun illegal ne’e tanba tiru povu nia karau haki’ak iha lutu laran.

Informasaun ne’ebé iha katak karau na’in sira hato’o ona keixa no aprezenta mós prova sira ba ona Komandante Jerál Polísia Nasionál Timor-Leste (PNTL), Komisariu Asistente Polísia Afonso dos Santos ho Xefe Estadu Maior Jenerál F-FDTL Tenente Jenerál Domingos Raúl “Falur Rate Laek”.

Jornalista: Juvinal Cabral dos Santos