Ró Inflável Ríjidu Unidade Lima Ba UPM ho Sosa ho Kustu US$174,000.00

Hatutan.com, (15 Maiu 2026) Díli-Kompañia  NIBRI 0507.Lda entrega ró ho tipu Inflável Ríjidu (RIB) ka Rigid Inflatable Boat  (RIB)  unidade lima ba Unidade Polísia Marítima (UPM) ne’ebé sosa ho orsamentu  Estadu tinan 2025 nian ho valor US$174.000.00.

Kompañia NIBRI 0507.Lda entrega ró ho tipu Inflável Ríjidu (RIB) ka Rigid Inflatable Boat (RIB) unidade lima ba Unidade Polísia Marítima (UPM). Foto/Juvinal Cabral dos Santos

“Ha’u nia parabéns ba kompañia NIBRI 0507.Lda ne’ebé entrega ona Ró lima ne’e mai ita halo operasaun iha área maritima iha nasaun Timor-Leste, ho oportunidade di’ak ida-ne’e ha’u husu ba Komandante UPM atu kontrola sasán ne’ebé mak governu sosa entrega mai ita, la’ós ba para iha fatin ida la kontrola soe-tun, soe-sa’e tanba ne’e ha’u foti kedas medida ida urjenti la iha membru ida lori sasán estadu tula família,” Komandante Jerál Polísia Nasionál Timor-Leste (PNTL) Komisáriu Asistente Polísia Afonso dos Santos  hateten iha nia diskursu iha serimónia entrega Ró hi tipu Inflável Ríjidu unidade lima ba UPM iha Lecidere,  Díli, Sesta(15/05/2026).

Komandante Jerál PNTL ne’e informa, Governu entrega Ró ne’e ba Polísia gasta osan barak atu kontrola didi’ak para labele estraga sasán ne’ebé mak estadu fó ba ita”, Komandante Jerál PNTL afirma.

Nia hatutan, ba membru sira menus tebe-tebes maibé augenta tan fulan neen ka hitu sei aumenta membru Polísia.

Komandante Unidade Polísia Marítima (UPM), Superintendente Xefe Polísia Eugenio Pereira hateten, Kompañia NIBRI 0507.Lda lori Ró Inflável Ríjidu ne’ebé to’o mai iha ne’e nia prosesu orsamentu tinan fiskal 2025 nian.

“Ita nia parseiru Australianu sira mak apoiu makina Ró Speed 5 mai ita ho nia CC  250 ne’e ita iha planu atu halo kolokasaun Ró lima ba iha Postu UPM Covalima, Postu vizilánsia UPM Rejiaun Administrativa Espesial Oé-Cusse-Ambeno (RAEOA), Postu vizilánsia Com, Munisípiu Lautém nian no ida ba postu vizilánsia Atauro nian,” Komandante UPM, Superintendente Xefe Polísia Eugenio Pereira hateten.

“Ba futuru ita sei installa Postu vizilánsia iha Munisípiu Lautém, Postu Administrativu Lore nian no mós ita sei installa Postu vizilánsia iha Munisípiu Baucau, Postu-Administrativu Laga árae Mulia nian no ita sei installa mós Postu vizilánsia ida iha Munisípiu Viqueque área Beasu nian hodi kontrola ba iha movimentu aktividade ilisitu sira iha Kosta Sul nian,”  Superintendente Xefe Polísia Eugenio Pereira informa.

Iha fatin hanesan, Diretór  Kompañia NIBRI 0507.Lda, Luis Alves dehan, kompañia entrega Ró sira ne’e ba Polísia Nasionál Timor-Leste (PNTL) liu-hosi Unidade Polísia Marítima (UPM) atu nune’e UPM utiliza hodi hala’o nia misaun iha via marítima nian.

“Ami garante nia kualidade no Speed ne’ebé di’ak atu kontrola  ita nia marítima tanba ami uluk entrega ida ba UPM ate agora sei utiliza hadi kontrola ita nia marítima Ró Speed 5 ne’e ho total orsamentu US$174.000.00, ami garante ró ne’e iha kualidade ba operasaun iha tasi”, Diretór kompañia NIBRI 0507.Lda esplika.

Ró ho tipu Inflável Ríjidu (RIB) ka Ró Borracha ho Kasko Ríjidu ne’e nia karakterístika prinsipál sira husi RIB Rigid Hull, Parte okos halo husi material ne’ebé toos hanesan fibra vidru ka alumíniu. Tubu Ar: Parte leten hale’u ho tubu inflável elástiku ho presaun aas.

Estabilidade Aas, Tubu ar nian mantein ekilíbriu ró nian maski iha tasi ne’ebé maka’as no uza motór esternu (ho marka Suzuki).

Dabarak uza hosi ekipa Polísia Marítima sira tanba ida-ne’e ágil no lalai tanba patrullamentu seguransa sai hanesan frota prinsipál hosi polísia marítima nian tanba tipu ró ne’e uza ba mobilizasaun lalais forsa espesiál sira iha bee laran.

Jornalista: Juvinal Cabral dos Santos