Ramos-Horta Sei Estuda Didi’ak Molok Fó Indultu ba Dadur sira, Inklui Ricard Dasbach

Hatutan.com, (20 Maiu 2026) Díli-Prezidente Repúblika (PR) José Ramos Horta, informa lista indultu ba dadur besik ema na’in-40  iha ona Unidade Departamentu Juridika Prezidénsia nian, nune’e  iha semana ne’e, nia sei haree no estuda hodi halo desizaun.

Eis Padre Richard Dasbach.

“Ha’u seidauk halo desizaun ruma, hanoin aban ka bainrua karik, ha’u seidauk haree tan, ha’u simu ona lista mais seidauk iha ha’u nia meza leten para haree, ha’u la lembra maibé iha na’in-30 ka 40, Richard Dasbach ha’u lahatene, ha’u seidauk simu lista ne’e,” Prezidente Repúblika José Ramos-Horta  informa ba jornalista sira iha Tasi-Tolu, Kuarta (20/05/2026).

Prezidente Repúblika afirma, lista indultu besik ema na’in-40 ne’e iha  Unidade Departamentu Juridika Prezidente  tiha ona iha loron hira liubá, maibé seidauk iha Prezidente Repúblika nia meza leten.

“Seidauk iha ha’u nia meza leten para ha’u haree didi’ak, la’ós de’it eis Padre Richard Dasbach ha’u hanoin hamutuk hotu na’in-40 hanesan ne’e,” Ramos Horta haktuir.

Prezidente Repúblika esplika, kona-bá eis Padre Richard Dasbach asuntu balun nia iha duvida, nune’e nia husu Igreja la iha duvida prontu fó indultu.

“Sosiedade sivíl lubuk ida hakerek karta mensajen oioin ne’e mós ha’u lee, ha’u estuda tanba ne’e mak ha’u sei demora loron ruma para halo desizaun, ha’u nia preokupasaun la’ós de’it eis Padre Richard Dasbach, ha’u nia preokupasaun ba ema kiak sira iha Gleno ka Becora no balun iha Suai ne’ebá,” Horta salienta.

“Ha’u haree kiak sira balun razaun umanitariu tanba moras ka tanba oan kiak, razaun oi-oin tantu governu sukat didi’ak semana hira nia laran ha’u seidauk deside, ha’u deside ita boot sira hatene aban ka bainrua,” Prezidente Repúblika José Ramos Horta afirma.

“Ha’u seidauk haree Eis Padre Richard Dasbach nia naran iha lista indultu ne’e ka lae, media mak hateten nia naran iha ne’ebá maibé ha’u seidauk haree,” Ramos Horta hateten.

Uluk fulan hira liubá antes fulan Novembru Prezidente ko’alia ho vítima sira, Organizasaun Naun Govermental (NGO-sigla Inglés) sira, Direitos Humanos no  Igreja balun depois halo desizaun fó  indultu.

eis saserdote Richard Dasbach, nu’udár  fundador orfanatu Topu Honis iha Oé-Cusse, hetan kondenasaun husi Tribunál Primieira Intánsia Oé-cusse tanba krime abuzu seksuál ba labarik. Vítima sira maka labarik-feto sira iha situasaun vulneravel tebes ne’ebé tuir loloos tenke moris iha nia kuidadu nia mahan.

Iha fulan-Dezembru tinan 2021, Tribunál Primeira Intánsia Oé-Cusse hatun desizaun fó sentensa ba eis-padre Richard Dasbach ho pena prizaun tinan-12.

Jornalista: Juvinal Cabral dos Santos