Vise-PM Husu MNEK Fó Karta Atensaun Bá Embaixadór Dionísio Babo Soares

Hatutan.com, (4 Juñu 2026), Díli–XI Governu Konstitusionál ne’ebé lidera husi Primeiru-Ministru (PM), Xanana Gusmão, lamentavel no lakontente  ho artigu opiniaun ne’ebé Embaixadór no Reprezentante  Timor-Leste ba Organizasaun Nasoins Unidas (ONU), Dionísio Babo Soares, hakerek no públika iha Agéncia Notisiosa Estadu Tatoli iha lian portugés ho titúlu “Reprensar as Relações Pequim-Díli a partir de Timor-Leste”.

artigu ne’ebé Dionísio Babo Soares públika iha portal Agéncia Notisiosa Tatoli. Foto/Repro

Artigu opiniaun ne’ebé públika iha portal Tatoli,I.P edisaun Segunda, 02 Juñu 2026, halo Governu Timor-Leste no liuliu Primeiru-Ministru (PM), Xanana Gusmão fó hatene ba Vise-Primeiru Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, hodi komunika ho Ministru Negosiu Estranjeiru no Kooperasaun (M NEK), Bendito Freitas, fó karta atensaun ba Embaixadór Dionísio Babo Soares.   

“Artigu ne’ebé Embaixadór Dionísio Babo Soares públika iha Tatoli ne’e la reprezenta Estadu Timor-Leste no la reprezenta mós partidu CNRT. Ne’e nia opiniaun pesoál ne’ebé tuir loos hanesan embaixadór ida labele no la permite atu halo kritika ba nasaun sira ne’ebé ita iha relasaun ida di’ak, inklui Estadu Xina,” Vise-PM Francisco Kalbuadi Lay  hateten ba jornalista sira, Kinta (04/06/2026), hodi kritika atitude Dionísio Babo Soares ni’an.

Vise-PM Francisco Kalbuadi Lay fundamenta katak saida mak Dionísio Babo Soares ko’alia ne’e la reprezeta Timor-Leste.  “Ami lee tiha buat ne’e,   Primeiru-Ministru  bolu kedas no husu  MNEK fó karta bolu atensaun forte ba Dionísio Babo Soares,”.  

 Vise-Primeiru Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay  nu’udár mós Sekretáriu Jerál partidu CNRT, afirma tuir loloos Embaixadór Dionísio Babo Soares, hetan previleizu nu’udár Embaixadór no reprezentante Timor-Leste ba ONU iha Nova Iorke tenke iha sentidu Estadu, no tenke hatene  saida mak bele ko’alia no  saida labele ko’alia, nune’e  evita atu perturba relasaun di’ak ne’ebé durante ne’e Timor-Leste harii no estabelese ho nasaun sira hotu, inklui Xina.

“Timor-Leste amigu no harii relasuan di’ak  ho ema hotu no ho nasaun hotu-hotu, la iha nesesidade ida atu kritika fali rai ida ne’ebé amizade tebes ho ita, inklui Estadu Xina  dezde kedas ita sei iha tempu rezisténsia nian to’o mai ukun rasik aan ida-ne’e.  Ita presiza ema hotu nia kooperasaun no evita atu kontribui ba estraga Timor-Leste nia relasaun diplomasia ho rai sira seluk, inklui mós ita-nia nasaun amigu di’ak Xina,” Vise-PM Francisco Kalbuadi Lay afirma.

Sekretáriu Jerál partidu CNRT ne’e konfirma katak artigu ne’ebé Dionísio Babo Soares, hakerek laiha relasaun ka la reprezenta Estadu Timor-Leste no  la reprezenta mós partidu CNRT tanba partidu rasik esklui tiha ona Dionísio Babo Soares dezde kedas tinan 2017.

“Partidu CNRT esklui tiha ona Dionisío Babo Soares husi CNRT dezde kedas tinan 2017. Iha nia suku rasik de’it mós partidu CNRT lakon iha eleisaun jerál sira. Nia la direitu ko’alia lori partidu CNRT, no atu dehan de’it katak CNRT partidu boot no partidu mais votadu, la iha relasaun ho Dionísio Babo Soares ne’ebé hakerek buat ida laiha nosaun Estadu hanesan ema frustradu,” Sekretáriu Jerál CNRT Francisco Kalbuadi Lay afirma tan.    

Vise-Primeru Ministru Francisco Kalbuadi Lay afirma tan katak Timor-Leste hanesan nasaun  iha relasaun di’ak ho nasaun hotu-hotu ba harii paz, estabilidade no buka kontrubui ba dezenvolvimentu ida prosperu, tanba ne’e, labele ko’alia hanesan ema frustradu boot.

Ekipa Hatutan.com