PR Horta Deklara Sei Veta Lei Kriminaliza Difamasaun

Hatutan.com, (10 Juñu 2026), Díli– Prezidente Repúblika, José Ramos-Horta, deklara veta lei kriminaliza difamasaun  bainhira Parlamentu Nasionál aprova.

Prezidente Repúblika, José Ramos-Horta.

Prezidente Repúblika, José Ramos Horta  ba Jornalista sira iha Otél Timor, Kuarta (10/10/2026) afirma difamasaun la’ós de’it akontese iha mídia, maibé mós iha diskursu polítiku sira iha Parlamentu Nasionál, ne’ebé dala barak envolve akuzasaun no kritika bá malu, inklui bá Primeiru-Ministru no Prezidente Repúblika.

“Tansá  preokupa fali ho projetu lei kriminalizasaun difamasaun, di’ak liu haree tau matan bá aselera investimentu projetu sira, kria empregu ne’e mak preokupa bá ida-ne’e. Lalika preokupa fali ho projetu lei kriminalizasaun difamasaun,” José Ramos-Horta hateten.

Xefe Estadu ne’e hatutan,  Timor-Leste tenke kontinua hametin nia reputasaun hanesan nasaun ida ne’ebé garante liberdade imprensa no liberdade espresaun di’ak liu iha rejionál no mundiál.

Nia  dehan, jornalista sira labele hetan tratamentu diferente husi ema seluk iha sosiedade, no aviza katak lei ne’ebé bele limita liberdade imprensa sei afeta imajen demokrásia Timor-Leste iha mundu.

Nia konsidera katak, iha era média sosiál atuál, difisil tebes atu kontrola informasaun liuhosi mekanizmu kriminalizasaun. Tanba ne’e, nia husu atu lalika lakon tempu ho  debate kona-bá projetu lei kriminaliza difamasaun, no konsentra ba lei sira ne’ebé fasilita investimentu hodi promove kresimentu ekonómiku.

PR Horta,  reafirma, Timor-Leste sai ezemplu ida bá liberdade no demokrásia, rezultadu husi luta naruk povu timoroan nian bá liberdade, tanba komunidade internasionál barak admira Timor-Leste tanba nia sistema demokrátiku no liberdade imprensa ne’ebé forte.

“Joven sira ka povu Timor tinan  sira bá kotuk luta to’o balun mate ba liberdade loloos. Timor tenke kontinua nune’e. Ema barak iha mundu admira, Timor-Leste liberdade, demokrásia di’ak loos, la monu, hanesan rai osidentál balun,” Laureadu Nobel da Paz 1996 ne’e afirma.

Kona-bá possibilidade Parlamentu Nasionál aprova projetu lei kriminaliza defamasaun, tuir PR Horta katak nia sei estuda primeiru konteúdu lei ne’ebé haruka bá Palásiu Prezidensiál. Maibé nia hateten klaru katak, se objetivu prinsipál mak atu kriminaliza defamasaun husi média no limita liberdade imprensa, nia la sei promulga lei refere.

“Ha’u hanoin di’ak liu hatun tiha lei ruma ne’ebé limita liberdade imprensa, nune’e Timor-Leste kontinua sai ezemplu di’ak ida bá mundu tomak,” Ramos-Horta hateten.

Jornalista: Marcelino Tomae