Timor-Leste no Vietname Asina Akordu Haat Bá Hametin Kooperasaun Bilaterál

Hatutan.com, (10 Juñu 2026), Díli– Timor-Leste no Vietname fortalese tan  relasaun bilaterál liu-husi asina akordu haat foun ne’ebé fokus  bá hametin kooperasaun iha área estratéjika sira, liu-liu edukasaun, ensinu superiór, mobilidade, no média.

Timor-Leste no Vietname fortalese tan relasaun bilaterál.

Komunikadu ofisial ne’ebé Hatutan.com, Kuarta (10/06/2026), haktuir Primeiru-Ministru Timor-Leste, Xanana Gusmão, hasoru ho Primeiru-Ministru Vietname, Le Minh Hung,  halo enkontru bilaterál ne’ebé marka pasu importante ida iha relasaun diplomátika entre nasaun rua.

Tuir  akordu haat ne’ebé Timor-Leste  Viatname   iha asian  kobre bá, kooperasaun iha edukasaun no ensinu superiór, inklui interkámbiu estudante no dosente sira, formasaun, no programa peskiza akademika, Izensaun vistu bá portadór pasaporte diplomátiku no servisu, kooperasaun média entre Ájensia Notisioja Tatoli, I.P no Vietnam News Agency,  hametin kontaktu institusionál no parseria estratéjika entre instituisaun sira

Iha área ekonomia, Timor-Leste mós kontinua konsidera Vietname nu’udár parseiru importante ida, liuliu tanba kontribuisaun investimentu sira, inklui iha setor telekomunikasaun liuhosi Telemor, ne’ebé ajuda aumenta konektividade iha país tomak.

Primeiru-Ministru (PM), Kay Rala Xanana Gusmão konsidera Vietname nu’udár parseiru importante ida bá dezenvolvimentu Timor-Leste (TL) no reafirma vontade Governu atu hametin kooperasaun bilaterál iha área estratéjika oioin.

“Ami sente onradu mai iha Vietname nu’udár nasaun belun di’ak ida. Timor-Leste valoriza tebes Vietname nu’udár belun ida ne’ebé kleur ona. Ita-nia nasaun rua fahe esperiénsia istórika importante, luta bá dignidade nasionál, rekonstrusaun no kompromisu atu harii instituisaun forte hodi hadi’a povu nia moris,” PM Xanana hateten.

Xefe Governu subliña, investimentu Vietname nian fó ona kontribuisaun signifikativu bá Timor-Leste, partikularmente iha seitór telekomunikasaun liu-hosi Telemor, ne’ebé ajuda habelar konetividade móvel iha nasaun laran tomak.

Timor-Leste hakarak kontinua atrai investimentu no kooperasaun hosi Vietname iha área estratéjika sira hanesan agrikultura, peska, turizmu, infraestrutura no dezenvolvimentu rekursu umanu ne’ebé konsideradu importante bá dezenvolvimentu ekonómiku nasaun nian.

Timor-Leste mós manifesta interese atu esplora renovasaun Akordu Komérsiu Foos nian ne’ebé kaduka desde 2017. Tuir PM Xanana, seguransa ai-han kontinua sai prioridade nasionál ida no Vietname iha esperiénsia importante nu’udár eksportadór foos iha rejiaun.

Timor-Leste mós simu ho laran-haksolok proposta Vietname nian atu estabelese Komisaun Konjunta bá Kooperasaun Bilateral, ne’ebé sei sai mekanizmu importante hodi hametin relasaun no amizade entre nasaun rua.

PM Xanana aproveita hodi agradese bá Vietname ne’ebé fó apoiu bá adezaun Timor-Leste nian bá ASEAN, ne’ebé konsideradu nu’udár pasu istóriku ida bá integrasaun rejionál Timor-Leste nian.

“Ami hakarak aprende hosi Vietname nia esperiénsia, partikularmente iha integrasaun ekonómika, dezenvolvimentu institusionál, diplomasia rejionál no koordenasaun ASEAN nian. Ami mós fó sai ona ami-nia intensaun atu prezide ASEAN iha 2029 no hein atu simu Vietname nia apoiu no orientasaun,” PM Xanana agradese.

Xanana Gusmão aborda situasaun globál atuál no enfatiza importánsia respeitu bá Lei Internasionál, diálogu no kooperasaun hodi prevene konflitu sira. Xanana Gusmão observa katak, Vietname hatudu ona, katak diplomasia bele kontribui bá estabilidade no dame, la’ós de’it iha Sudeste Aziátiku maibé iha komunidade internasionál tomak.

PM Xanana partisipa iha enkontru bilaterál ne’e akompaña hosi membru Governu no delegasaun ofisiál Timor-Leste nian, inklui Vise-Primeiru-Ministru sira, Ministru sira, Vise-Ministru sira, Sekretáriu Estadu sira, Embaixadór Timor-Leste iha Vietname no reprezentante instituisaun Estadu sira.

Jornalista: Marcelino Tomae