Janeiru-Maiu 2026, PNTL Díli Rejista Kazu Hamutuk 575

Hatutan.com, (15 Juñu 2026) Díli-Polísia Nasionál Timor-Leste (PNTL) Munisípiu Díli  rejista kazu hamutuk 575 durante periódu fulan-Janeiru to’o fulan-Maiu tinan 2026.

Superintendente Assistente polísia Rogério dos Reis.

“Hakarak informa ba iha públiku katak, investigasaun Komandu Munisípiu Díli, husi fulan-Janeiru mai to’o fulan-Maiu, tinan ne’e, rejistu kazu hamutuk 575. Husi kazu hirak ne’e, Polísia submete hotu ona ba iha MP,” Xefe Seksaun Investigasaun Kriminál  Polísia Munisípiu Dili, Superientendente Assistente Polísia Rogério dos Reis informa ba jornalista sira iha nia servisu fatin, Díli, Segunda (15/06/2026).

Aliende ne’e, husi fulan-Janeiru to’o mai iha fulan-Maiu 2026,  Polísia  simu delegasaun kompetensia hamutuk-87 ne’ebé MP  no finaliza ona kazu balun hodi remete fali ba MP halo akuzasaun hodi proses aba Tribunál.

Superintendente Assistente polísia Rogério dos Reis haktuir, kazu balun iha progresu tanba testemuña, suspeitu, vítima seidauk identifika, entaun iha progresu maibé hein nafatin submete fali ba iha MP nune’e bele hetan desizaun husi MP.

Tipu kazu ofensa ba integridade fízika grave no mós ba iha violénsia domestika, inklui sira seluk, normalmente kada tinan kazu ne’e akontese maioria husi parte Dom Aleixo ninian, ne’ebé polísia simu husi Postu Administrativu Dom Aleixo nian hamutuk kazu 44.

Kazu sira-ne’e nia kauza ne’e mai husi problema sosiál, dalaruma dezempregu, kampu traballu la iha, fatór ekonomia, disputa rai no balun tanba arte-marsiál.

Jornalista: Juvinal Cabral dos Santos