PNTL Asegura Ona Suspeita Tenta Soe Nia Bebe iha Dom Bosco-Comoro

Hatutan.com, (15 Juñu 2026) Díli-Polísia Nasionál Timor-Leste (PNTL) asegura ona suspeita ne’ebé tenta soe  nia bebe iha área Dom Bosco-Comoro, Díli.  

Bebe mane oan ne’ebé nia inan tenta soe iha área Dom Bosco-Comoro hala’o hela tratamentu iha Postu Saúde Kampu Baru. Foto/Juvinal Cabral dos Santos

Iha Domingu, 14 Juñu ne’e, haleu tuku 10:00 Otl, suspeta ida tenta atu soe bebe mane-oan ida  iha área Dom Bosco, Suku Comoro, Postu-Administrativu Dom Aleixo, Munisípiu Díli, tanba ta’uk ba família sira.

Xefe Seksaun Investigasaun Kriminál Polísia Munisípiu Díli, Superintendente Assistente polísia Rogério dos Reis, informa suspeita ne’e konfesa ba autpridade sira katak nia  soe bebe ne’e  tanba presaun psikolojia husi família sira, liu-liu nia aman siak demais, dalaruma bele baku mate nia no oho nia.

“Dalaruma mós presaun psikolojia husi nia kolega sira la fó hanoin di’ak ba suspeita nu’udar bebe nia inan. Intensaun atu soe bebe, maibé nia la konsege soe bebe. Polísia  asegura ona suspeita,” Superintendente Assistente Polísia Rogério dos Reis ba jornalista sira iha nia knar fatin, Segunda (15/06/2026).

Xefe Seksaun Investigasaun Kriminál Polísia Munisípiu Díli ne’e hateten, iha suspeita hanesan mós funsionária iha Dom Bosco nian depois nia partus bebe oan ida, nia falun ho hena tau iha nia fatin hodi telefone ba kolega servisu, nia bosok nia kolega dehan  katak ema soe bebe mak nia hili.

“Maibe la’ós hanesan nia ko’alia ne’e bainhira sasin ne’e to’o fatin, orientasaun husi Amu Padre  Parokia Dom Bosco nian konsege lori bebe oan ne’e ba Sentru Saúde Kampu Baru hodi hala’o tratamentu,” Superintendente Assistente Polísia Rogério dos Reis haktuir.

PNTL liu-hosi Komandu Munisípiu Díli inklui  Vulnerable Person Unit (VPU) to’o kedas iha fatin  lokal bá krime nian hodi asegura suspeita lori ba iha parte médiku nian hodi halo tratamentu ba nia no kontinua mai iha VPU hadi halo prosesu ba nia.

“Temporia bebe ho nia inan parte saúde halo hela tratamentu ba nia iha HNGV bainhira nia kondisaun rekopera mak  ita bele entrega ba nia família sira,” nia hateten.

Suspeita agora dadaun ho nia oan iha HNGV, maibé kazu ne’e prosesu la’o nafatin, sei prega ho Artigu 23° no 143° Kódigu Penál Timor-Leste kona-ba inan abandona ka la kuidadu nia oan.

Polísia kontinua buka tuir bebe nia aman bainhira bebe nia inan rekopera hafoin halo indentifikasaun ba bebe nia aman.

Jornalista: Juvinal Cabral dos Santos