PNTL Detein Membru IKS.PTL Na’in-Neen Treinu Subar iha Bebonuk

Hatutan.com, (15 Juñu 2026), Díli-Polísia Nasionál Timor-Leste (PNTL)  Munisípiu Díli detein membru  organizasaun arte-marsiál husi  Ikatan Keluarga Silat Putra Timor-Leste (IKS.PTL-sigla Indonézia) na’in-neen ne’ebé pratika treina subar iha Suku  Bebonuk, Postu-Administrativu Dom Aleixo, Munisípiu Díli.

Suspeitu na’in-neen ne’ebé pratika atividade aprendizajen arte-marsiál husi IKS-PTL iha Bebonuk. Foto/Juvinal Cabral dos Santos

“Kazu kona-bá atributu arte-marsiá ne’e, Domingu madrugada, 14 Juñu ne’e, ita prende iha Bebonuk, área Dom Aleixo nian tanba iha  membru grupu arte-marsiál   hala’o atividade treinamentu,” Xefe Seksaun Investigasaun Kriminál Polísia Munisípiu Díli, Superientendente Assistente   Polísia Rogério dos Reis,  informa  ba jornalista sira iha nia knaar fatin, Segunda (15/06/2026).

Xefe Seksaun Investigasaun Kriminál Polísia Munisípiu Díli ne;e ifnorma  tuir rezolusaun Governu nian kontinua suspende atividade arte-marsiál ho arte-rituál, maibé realidade, individuu sira kontinua la’o nafatin. Ho nune’e, polísia hetan informasaun husi halo kedas atuasaun no kapturasaun.

“Polísia konsege asegura suspeitu sira ne’ebé mak envolve iha treinamentu subar, agora na’in-neen mak  submete ba prosesu detensaun 72 oras no iha tempu badak nia laran Polísia sei aprezenta ba iha Ministériu Públiku (MP) hodi kontinua ba Tribunál,” Superientendente Assistente Polísia Rogério dos Reis, informa.

Xefe Seksaun Investigasaun Kriminál Polísia Munisípiu íili, Superientendente Assistente  Polísia Rogério dos Reis, haktuir,  membru sira  ne’ebé halo pratika treinu subar ne’e mai husi organizasaun arte-marsiál IKS.PTL kompostu husi feto na’in-rua no mane na’in-haat.

Iha loron 3 fulan-Juñu tinan 2026, liu husi  Reuniaun Konsellu Ministru iha Palásiu Governu,  aprova  projetu Rezolusaun Governu nian, ne’ebé hanaruk, to’o loron 31 fulan-Dezembru tinan 2026, períodu vijénsia suspensaun ba ensinu aprendizajen no prátika arte-marsiál no enserramentu temporáriu ba fatin no instalasaun hotu-hotu ne’ebé destinadu ba ensinu, aprendizajen no prátika arte marsiál.

Desizaun ne’e kontinua Rezolusaun Governu nian Nú. 45/2023, loron 10 fulan-Novembru, ne’ebé prolonga ona tuituir malu husi Rezolusaun sira Nú. Asumsaun sira ne’ebé justifika suspensaun ne’e vigora nafatin, nomeadamente nesesidade atu konsolida dame sosiál ne’ebé hetan ona dezde fulan-Novembru tinan 2023 no atu garante katak prátika arte marsiál sira nian monu eskluzivamente ho atividade saudavel no desportista ida ne’ebé maka’as kontribui ba edukasaun no formasaun sívika no umanístika ba joven sira.

Jornalista: Juvinal Cabral dos Santos